മുംബൈ: പ്രമുഖ നാടക-ചലച്ചിത്ര നടൻ വിജയ് ക്രിഷ്ണ (81) അന്തരിച്ചു (Vijay Crishna Passes Away). ചൊവ്വാഴ്ച വൈകുന്നേരമായിരുന്നു അന്ത്യം. സഞ്ജയ് ലീല ബൻസാലിയുടെ വിഖ്യാത ചിത്രം ‘ദേവദാസി’ൽ ഷാരൂഖ് ഖാൻ അവതരിപ്പിച്ച നായക കഥാപാത്രത്തിന്റെ പിതാവായ നാരായണദാസ് മുഖർജി എന്ന വേഷത്തിലൂടെയാണ് അദ്ദേഹം ചലച്ചിത്ര പ്രേമികൾക്കിടയിൽ ശ്രദ്ധേയനായത്.
സിനിമകളിൽ സജീവമായിരുന്നില്ലെങ്കിലും അഭിനയിച്ച ചിത്രങ്ങളിലെല്ലാം മികച്ച പ്രകടനം കാഴ്ചവെക്കാൻ അദ്ദേഹത്തിന് സാധിച്ചു. റിച്ചാർഡ് ആറ്റൻബറോയുടെ ‘ഗാന്ധി’ (1982) എന്ന ചിത്രത്തിലൂടെയാണ് വിജയ് ക്രിഷ്ണ സിനിമാരംഗത്ത് അരങ്ങേറ്റം കുറിച്ചത്. ഗുസാരിഷ് (2010), പി.കെ (2014), ചെയിൻ കുല്ലി കി മെയിൻ കുല്ലി (2007) എന്നിവയാണ് അദ്ദേഹത്തിന്റെ മറ്റു പ്രധാന ചിത്രങ്ങൾ.
സിനിമയേക്കാൾ നാടകരംഗത്താണ് അദ്ദേഹം കൂടുതൽ തിളങ്ങിയത്. മഹേഷ് ദത്താനിയുടെ വിഖ്യാത നാടകമായ ‘ഡാൻസ് ലൈക് എ മാൻ’ (Dance like a Man) എന്ന നാടകത്തിൽ 25 വർഷത്തിലേറെയായി അദ്ദേഹം അഭിനയിച്ചിരുന്നു. വിജയ് ക്രിഷ്ണയുടെ നിര്യാണത്തിൽ പ്രശസ്ത നടി ലില്ലെറ്റ് ദുബെ ഉൾപ്പെടെയുള്ള സഹപ്രവർത്തകർ അനുശോചനം രേഖപ്പെടുത്തി. “വളരെയധികം സ്നേഹിക്കപ്പെട്ടിരുന്ന, ബുദ്ധിമാനും ആകർഷകമായ വ്യക്തിത്വത്തിനുടമയുമായ ഒരു കലാകാരനെയാണ് നമുക്ക് നഷ്ടമായത്” എന്ന് ലില്ലെറ്റ് ഇൻസ്റ്റാഗ്രാമിൽ കുറിച്ചു.
