ദുബായ്: യുദ്ധസമാനമായ സാഹചര്യത്തെത്തുടർന്ന് വ്യോമപാത അടച്ചതോടെ പ്രതിസന്ധിയിലായ പ്രവാസികൾക്ക് ആശ്വാസമായി കൂടുതൽ വിമാന കമ്പനികൾ പരിമിതമായ സർവീസുകൾ പ്രഖ്യാപിച്ചു. മണിക്കൂറിൽ 48 വിമാനങ്ങൾക്ക് കടന്നുപോകാൻ കഴിയുന്ന രീതിയിൽ യുഎഇ സുരക്ഷിത വ്യോമ ഇടനാഴി തുറന്നതോടെയാണ് ഇന്ത്യൻ വിമാന കമ്പനികളായ എയർ ഇന്ത്യ എക്സ്പ്രസ്, ഇൻഡിഗോ, സ്പൈസ് ജെറ്റ് എന്നിവ പ്രത്യേക സർവീസുകൾ പ്രഖ്യാപിച്ചത്.
പ്രത്യേക സർവീസുകൾ ഇങ്ങനെ:
എയർ ഇന്ത്യ എക്സ്പ്രസ്: മാർച്ച് 5 മുതൽ 7 വരെ റാസൽഖൈമയിൽ നിന്ന് ഡൽഹി, കൊച്ചി, മുംബൈ എന്നിവിടങ്ങളിലേക്ക് സർവീസ് നടത്തും. കൊച്ചിയിൽ നിന്ന് വൈകിട്ട് 4.25-ന് പുറപ്പെട്ട് 8.55-ന് റാസൽഖൈമയിൽ എത്തും. തിരിച്ച് രാത്രി 9.55-ന് പുറപ്പെട്ട് പുലർച്ചെ 1.55-ന് കൊച്ചിയിലെത്തും. അൽ ഐനിൽ നിന്ന് കോഴിക്കോട്ടേക്കും സർവീസുകളുണ്ട്.
എയർ അറേബ്യ: മാർച്ച് 6, 7 തീയതികളിൽ ഇന്ത്യയിൽ നിന്ന് അബുദാബിയിലേക്ക് സർവീസ് നടത്തും. അഹമ്മദാബാദ്, കോഴിക്കോട്, കൊച്ചി, തിരുവനന്തപുരം, ചെന്നൈ എന്നിവിടങ്ങളിലേക്കാണ് ഈ സർവീസുകൾ.
സ്പൈസ് ജെറ്റ്: ഫുജൈറയിൽ നിന്ന് ഡൽഹി, മുംബൈ, കൊച്ചി നഗരങ്ങളിലേക്ക് മാർച്ച് 4, 5 തീയതികളിൽ പ്രത്യേക വിമാനങ്ങൾ പറക്കും.
ഇൻഡിഗോ: ഗൾഫ് രാജ്യങ്ങളിലേക്ക് ആകെ 30 സർവീസുകളാണ് ഇൻഡിഗോ നടത്തുക.
ടിക്കറ്റ് നിരക്കിലെ ‘കൊള്ള’
വിമാന സർവീസുകൾ പുനരാരംഭിച്ചെങ്കിലും ടിക്കറ്റ് നിരക്ക് പ്രവാസികൾക്ക് വലിയ വെല്ലുവിളിയാവുകയാണ്. ഫ്ലൈ ദുബായ് കൊച്ചി, കോഴിക്കോട് എന്നിവിടങ്ങളിലേക്ക് ഏകദേശം 71,400 രൂപ (2850 ദിർഹം) ആണ് ഈടാക്കുന്നത്. എന്നാൽ എയർ ഇന്ത്യ എക്സ്പ്രസിൽ അൽ ഐൻ – കോഴിക്കോട് റൂട്ടിൽ ഏകദേശം 7,000 രൂപ (300 ദിർഹം) മുതൽ ടിക്കറ്റുകൾ ലഭ്യമാണ്.
പരിമിതമായ സർവീസുകൾ മാത്രമുള്ളതിനാൽ ടിക്കറ്റുകൾ വേഗത്തിൽ വിറ്റുപോകുന്നുണ്ട്. എന്നാൽ നിലവിലെ അസ്ഥിരമായ സാഹചര്യം കാരണം വിമാനങ്ങൾ അവസാന നിമിഷം റദ്ദാക്കപ്പെടാനുള്ള സാധ്യതയുണ്ടെന്ന് ട്രാവൽ ഏജൻസികൾ മുന്നറിയിപ്പ് നൽകുന്നു.
Story Summary:
In a relief to stranded expatriates, several airlines including Air India Express, IndiGo, and SpiceJet have announced limited special flights between the UAE and India. This follows the opening of a safe air corridor in the UAE. While Air India Express offers competitive rates starting from 300 AED, private carriers like Fly Dubai are charging up to 2850 AED. Flights are scheduled from Ras Al Khaimah, Fujairah, and Al Ain to major Indian cities including Kochi and Kozhikode.
