ബെംഗളൂരു: ബെംഗളൂരുവിൽ അമ്മയുടെ മറ്റേർണിറ്റി ഫോട്ടോഷൂട്ടിനിടെ മൂന്ന് വയസ്സുകാരൻ വെള്ളക്കെട്ടിൽ വീണു മരിച്ചു (Bengaluru Toddler Drowning Accident). ചരൺ-സ്വാതി ദമ്പതികളുടെ മകൻ ലക്ഷ്മീർ ആണ് മരിച്ചത്. എട്ട് മാസം ഗർഭിണിയായ സ്വാതി തന്റെ രണ്ടാമത്തെ കൺമണിയെ വരവേൽക്കാനുള്ള തയ്യാറെടുപ്പിന്റെ ഭാഗമായി ഫോട്ടോഷൂട്ട് നടത്തുന്നതിനിടെയാണ് അപകടം സംഭവിച്ചത്.
ശനിയാഴ്ച നടന്ന ഫോട്ടോഷൂട്ടിനിടെ സമീപത്ത് കളിച്ചുകൊണ്ടിരുന്ന കുട്ടി അബദ്ധത്തിൽ അവിടെയുണ്ടായിരുന്ന ചെറിയ കുളത്തിലേക്ക് വീഴുകയായിരുന്നു. ഫോട്ടോഷൂട്ടിന്റെ തിരക്കിലായിരുന്നതിനാൽ കുട്ടി വെള്ളത്തിൽ വീണത് ആരുടെയും ശ്രദ്ധയിൽപ്പെട്ടില്ല. വൈകിയാണ് വിവരം അറിഞ്ഞത്. ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. തുടർന്ന് സർക്കാർ ആശുപത്രിയിൽ പോസ്റ്റ്മോർട്ടം നടപടികൾ പൂർത്തിയാക്കി. ജോലി സംബന്ധമായി വിദേശത്തായിരുന്ന കുട്ടിയുടെ പിതാവ് ഇന്ന് ബെംഗളൂരുവിൽ തിരിച്ചെത്തുമെന്ന് അധികൃതർ അറിയിച്ചു. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. ഫോട്ടോഷൂട്ട് നടന്ന സ്ഥലത്ത് സുരക്ഷാ വീഴ്ചയുണ്ടായോ എന്നതടക്കമുള്ള കാര്യങ്ങൾ പോലീസ് പരിശോധിച്ചുവരികയാണ്.
Summary: In a heartbreaking incident in Bengaluru, a three-year-old boy named Lakshmeer drowned in a pool during his mother’s maternity photoshoot.
