മുംബൈ: നോറ ഫത്തേഹിയും സഞ്ജയ് ദത്തും തകർപ്പൻ നൃത്തവുമായി എത്തിയ ‘സർക്കെ ചുനർ തേരി സർക്കെ’ എന്ന ഗാനത്തിന്റെ ഹിന്ദി പതിപ്പ് അശ്ലീല വരികളുടെ പേരിൽ വിവാദത്തിലായി (The Devil Movie Song Ban). സോഷ്യൽ മീഡിയയിൽ വലിയ പ്രതിഷേധം ഉയർന്നതിനെത്തുടർന്ന് ചിത്രത്തിന്റെ അണിയറപ്രവർത്തകർ ഗാനം ഡിജിറ്റൽ പ്ലാറ്റ്ഫോമുകളിൽ നിന്ന് നീക്കം ചെയ്തു. ധ്രുവ സർജ നായകനാകുന്ന ‘കെഡി: ദി ഡെവിൾ’ (KD: The Devil) എന്ന കന്നഡ പാൻ-ഇന്ത്യൻ ചിത്രത്തിലേതാണ് ഈ ഗാനം.
ഗാനത്തിലെ വരികളും നൃത്തചിത്രീകരണവും അശ്ലീലമാണെന്നും ഇത് പ്രായപൂർത്തിയാകാത്ത കുട്ടികളെ മോശമായി ബാധിക്കുമെന്നും ചൂണ്ടിക്കാട്ടി അഡ്വക്കേറ്റ് വിനീത് ജിൻഡാൽ സെൻസർ ബോർഡിന് പരാതി നൽകിയിരുന്നു. വാർത്താവിനിമയ മന്ത്രാലയത്തിനും അദ്ദേഹം കത്തയച്ചു. ഗാനം പൊതുമര്യാദ ലംഘിക്കുന്നതാണെന്നും ഭാരതീയ ന്യായ സംഹിത, ഐടി ആക്ട്, പോക്സോ, നിയമപ്രകാരം നടപടി വേണമെന്നുമാണ് പരാതിയിലെ ആവശ്യം. ഇതേത്തുടർന്ന് ഡൽഹി പോലീസ് സൈബർ സെല്ലിലും ക്രിമിനൽ പരാതി ഫയൽ ചെയ്തിട്ടുണ്ട്.
ഗാനത്തിലെ ഇരട്ട അർത്ഥമുള്ള വരികൾക്കെതിരെ എക്സ് ഉൾപ്പെടെയുള്ള പ്ലാറ്റ്ഫോമുകളിൽ വലിയ പ്രതിഷേധമാണ് നടന്നത്. “ഇന്ത്യയിൽ സെൻസർ ബോർഡ് ഉണ്ടോ?” എന്നും “ഇത്തരം ഗാനങ്ങൾ യുവാക്കളെ വഴിതെറ്റിക്കും” എന്നും പലരും പ്രതികരിച്ചു. മംഗ്ലി ആലപിച്ച ഗാനത്തിന് അർജുൻ ജന്യയാണ് സംഗീതം നൽകിയത്. വിവാദമായതോടെ ഹിന്ദി പതിപ്പ് നീക്കം ചെയ്തെങ്കിലും കന്നഡ, തമിഴ്, തെലുങ്ക്, മലയാളം പതിപ്പുകൾ ഇപ്പോഴും ലഭ്യമാണ്.
പ്രേം സംവിധാനം ചെയ്യുന്ന ‘കെഡി: ദി ഡെവിൾ’ എഴുപതുകളിലെ അധോലോകത്തിന്റെ കഥയാണ് പറയുന്നത്. സഞ്ജയ് ദത്ത്, ശില്പ ഷെട്ടി തുടങ്ങിയ വൻ താരനിര അണിനിരക്കുന്ന ചിത്രം 2026 ഏപ്രിൽ 30-ന് തിയേറ്ററുകളിൽ എത്തും.
