ന്യൂഡൽഹി: പാർലമെന്റ് ബജറ്റ് സമ്മേളനത്തിന്റെ പന്ത്രണ്ടാം ദിനം നാടകീയ നീക്കങ്ങൾക്ക് സാക്ഷ്യം വഹിക്കുന്നു. കോൺഗ്രസ് എംപിയും പ്രതിപക്ഷ നേതാവുമായ രാഹുൽ ഗാന്ധിയുടെ പാർലമെന്റ് അംഗത്വം റദ്ദാക്കണമെന്ന് ആവശ്യപ്പെട്ട് ബിജെപി നോട്ടീസ് നൽകി (Rahul Gandhi Parliament Membership Termination). ബുധനാഴ്ച ലോക്സഭയിൽ രാഹുൽ ഗാന്ധി നടത്തിയ പ്രസംഗത്തിൽ ഇന്ത്യ-അമേരിക്ക വ്യാപാര കരാറിനെയും കേന്ദ്ര ബജറ്റിനെയും രൂക്ഷമായി വിമർശിച്ചിരുന്നു. ഇതേത്തുടർന്നാണ് ഭരണപക്ഷം രാഹുലിനെതിരെ തിരിഞ്ഞത്.
മുൻ കരസേനാ മേധാവി ജനറൽ എം.എം. നരവാനെയുടെ പ്രസിദ്ധീകരിക്കാത്ത ആത്മകഥയെക്കുറിച്ച് പരാമർശിച്ചതിന് പിന്നാലെ രാഹുൽ ഗാന്ധിയെ സംസാരിക്കാൻ അനുവദിക്കാത്തതിൽ പ്രതിഷേധിച്ച് പ്രതിപക്ഷം സഭയിൽ ബഹളം വെച്ചിരുന്നു. ഇതിനിടയിലാണ് നിർണ്ണായകമായ വ്യാപാര കരാറിനെതിരെ അദ്ദേഹം രംഗത്തെത്തിയത്. കരാറിലെ ജനവിരുദ്ധ വ്യയവസ്ഥകൾക്കെതിരെയും കർഷകരോട് ഐക്യദാർഢ്യം പ്രഖ്യാപിച്ചും പ്രതിപക്ഷ എംപിമാർ മകർ ദ്വാറിന് മുന്നിൽ പ്രതിഷേധം തുടരുകയാണ്.
രാഹുൽ ഗാന്ധിക്കെതിരെയുള്ള ബിജെപിയുടെ നീക്കം അദ്ദേഹത്തെ ബാധിക്കില്ലെന്ന് പ്രിയങ്ക ഗാന്ധി പ്രതികരിച്ചു. ഇന്ത്യ-യുഎസ് വ്യാപാര കരാർ മൂലം കർഷകർക്ക് വലിയ നഷ്ടമുണ്ടാകുമെന്നും അവർ കൂട്ടിച്ചേർത്തു. ജനുവരി 28-ന് ആരംഭിച്ച ബജറ്റ് സമ്മേളനം ഏപ്രിൽ 2 വരെയാണ് തുടരുക. പാർലമെന്ററി സ്റ്റാന്റിംഗ് കമ്മിറ്റികൾക്ക് മന്ത്രാലയങ്ങളുടെ ഡിമാൻഡ് ഫോർ ഗ്രാന്റുകൾ പരിശോധിക്കുന്നതിനായി ഫെബ്രുവരി 13 മുതൽ മാർച്ച് 9 വരെ സഭ താൽക്കാലികമായി പിരിയും.
Summary: The BJP has filed a notice to terminate Rahul Gandhi’s Parliament membership following his critical speech on the India-US trade deal and the Union Budget.
