Follow on Google News
ന്യൂഡൽഹി: വിമാനയാത്രയ്ക്കിടയിൽ യാത്രക്കാർ പുലർത്തുന്ന മോശം ശുചിത്വ ശീലങ്ങളെയും ജീവനക്കാരോടുള്ള അനാദരവിനെയും രൂക്ഷമായി വിമർശിച്ച് ട്രാവൽ ബ്ലോഗർ സന്ധ്യ മാജി (Passenger Hygiene Commercial Flights). വിമാനങ്ങളിലെ ശൗചാലയങ്ങൾ ഉപയോഗശൂന്യമായ രീതിയിൽ വൃത്തികേടാക്കുന്നതും മാലിന്യങ്ങൾ സീറ്റുകളിൽ ഉപേക്ഷിക്കുന്നതും ക്യാബിൻ ക്രൂ ജീവനക്കാരെ കടുത്ത പ്രതിസന്ധിയിലാക്കുന്നുവെന്ന് സന്ധ്യ ചൂണ്ടിക്കാട്ടി. താൻ നേരിട്ട ദുരനുഭവങ്ങൾ പങ്കുവെച്ചുകൊണ്ടുള്ള സന്ധ്യയുടെ പോസ്റ്റ് ഇപ്പോൾ സോഷ്യൽ മീഡിയയിൽ വലിയ ചർച്ചയാകുകയാണ്.
ശൗചാലയങ്ങളിൽ ടിഷ്യൂ പേപ്പറുകളും മൂത്രവും വാരിയിട്ടിരിക്കുന്നത് കണ്ട ജീവനക്കാരി അത് സ്വന്തം കൈകൊണ്ട് വൃത്തിയാക്കേണ്ടി വന്ന സാഹചര്യം തന്നെ വേദനിപ്പിച്ചുവെന്ന് സന്ധ്യ കുറിച്ചു. വിമാനയാത്രക്കാർ സ്വന്തം പെരുമാറ്റത്തിൽ ഉത്തരവാദിത്തം കാണിക്കണമെന്നും അവർ ആവശ്യപ്പെട്ടു. ഇന്ത്യൻ യാത്രക്കാർ കൂടുതലുള്ള വിമാനങ്ങളിൽ ഇത്തരം പ്രശ്നങ്ങൾ വർദ്ധിക്കുന്നതായി തോന്നുന്നുവെന്നും, ഒരു വിമാനയാത്ര സർക്കാർ ബസിലെ യാത്ര പോലെ അനുഭവപ്പെട്ടുവെന്നും അവർ തുറന്നടിച്ചു.
മാലിന്യം വലിച്ചെറിയുന്നതും വൃത്തികേടാക്കുന്നതും വിമാന സർവീസുകൾ വൈകാൻ കാരണമാകുന്നുണ്ടെന്നും സന്ധ്യ ചൂണ്ടിക്കാട്ടി. ഓരോ യാത്രയ്ക്കും മുൻപ് വിമാനം വൃത്തിയാക്കാൻ ജീവനക്കാർക്ക് കൂടുതൽ സമയം ചിലവഴിക്കേണ്ടി വരുന്നത് ഷെഡ്യൂളുകളെ ബാധിക്കും. വിമാന ജീവനക്കാർ കഠിനമായ പരിശീലനം കഴിഞ്ഞ് ജോലിയിൽ പ്രവേശിക്കുന്ന പ്രൊഫഷണലുകളാണെന്നും മറ്റുള്ളവർ വരുത്തിവെക്കുന്ന മാലിന്യങ്ങൾ വൃത്തിയാക്കേണ്ടവരല്ല അവരെന്നും സന്ധ്യ ഓർമ്മിപ്പിച്ചു. എവിടെയായാലും മാലിന്യങ്ങൾ വലിച്ചെറിയുന്നത് ലജ്ജാകരമായ കാര്യമാണെന്ന് പറഞ്ഞാണ് അവർ പോസ്റ്റ് അവസാനിപ്പിച്ചത്.
View this post on Instagram
