മുംബൈ: ഗതാഗത നിയമങ്ങളെ കാറ്റിൽപ്പറത്തി ഒരു സ്കൂട്ടറിൽ ആറ് കുട്ടികൾ അപകടകരമായി യാത്ര ചെയ്യുന്ന വീഡിയോ പുറത്ത് (Mumbai Kurla Scooter Viral Video). മുംബൈയിലെ തിരക്കേറിയ കുർള സിഎസ്ടി റോഡിലാണ് സംഭവം. വീഡിയോ സമൂഹമാധ്യമങ്ങളിൽ വൈറലായതോടെ കുട്ടികളുടെ സുരക്ഷയെക്കുറിച്ചും റോഡ് നിയമങ്ങളെക്കുറിച്ചും വലിയ ആശങ്കയാണ് ഉയരുന്നത്.
ഒരു സ്കൂട്ടറിൽ ആറ് പേർ ഇരിക്കുന്നതിന് പുറമെ, ഒരു കുട്ടി സ്കൂട്ടറിന്റെ സൈലൻസറിൽ കാൽ വെച്ച് പുറകിൽ തൂങ്ങിനിൽക്കുന്നതും വീഡിയോയിൽ കാണാം. മറ്റുള്ളവർ വശങ്ങളിലേക്ക് കാലുകൾ തൂക്കിയിട്ട് ഇടുങ്ങിയ രീതിയിലാണ് ഇരിക്കുന്നത്. യാത്ര ചെയ്ത ആരും തന്നെ ഹെൽമറ്റ് ധരിച്ചിരുന്നില്ല. സ്കൂട്ടർ ഓടിച്ച കുട്ടി ഉൾപ്പെടെ എല്ലാവരും പ്രായപൂർത്തിയാകാത്തവരാണെന്നാണ് പ്രാഥമിക നിഗമനം.
View this post on Instagram
മറ്റ് വാഹനങ്ങളെ മറികടന്ന് അതിവേഗത്തിലാണ് കുട്ടികൾ സ്കൂട്ടർ ഓടിക്കുന്നത്. ഇത്രയധികം ഭാരം കയറ്റിയതിനാൽ സ്കൂട്ടറിന്റെ ബാലൻസ് ഏത് നിമിഷവും നഷ്ടപ്പെടാവുന്ന അവസ്ഥയിലായിരുന്നു. കുട്ടികൾക്ക് വാഹനം ഓടിക്കാൻ നൽകുന്ന മാതാപിതാക്കളുടെ മേൽനോട്ടക്കുറവിനെതിരെയും നിയമം ശക്തമാക്കണമെന്ന ആവശ്യത്തിനെതിരെയും വലിയ വിമർശനം ഉയരുന്നുണ്ട്. മോട്ടോർ വാഹന നിയമപ്രകാരം പ്രായപൂർത്തിയാകാത്തവർ വാഹനം ഓടിക്കുന്നത് വലിയ പിഴയും ശിക്ഷയും ലഭിക്കാവുന്ന കുറ്റമാണ്.
