കുർള : വനിതാ ഡോക്ടർക്ക് നേരെ അതിക്രമം നടത്തിയ കേസിൽ രണ്ടു പേർക്കെതിരെ കുർള പോലീസ് കേസെടുത്തു (Mumbai Doctor Assault News). ആശുപത്രിയിലെ എമർജൻസി വാർഡിൽ ചികിത്സയ്ക്കെത്തിയ രോഗിക്കൊപ്പമുണ്ടായിരുന്നവരാണ് ഡോക്ടറെ അധിക്ഷേപിക്കുകയും ഭീഷണിപ്പെടുത്തുകയും ചെയ്തത്. ഡോക്ടർമാർക്കെതിരെയുള്ള അതിക്രമങ്ങൾ വർദ്ധിക്കുന്ന സാഹചര്യത്തിൽ ഈ സംഭവം വലിയ പ്രതിഷേധത്തിന് കാരണമായിട്ടുണ്ട്.
രാത്രി വൈകി ഭാഭ ഹോസ്പിറ്റലിലെ എമർജൻസി വാർഡിലാണ് സംഭവം നടന്നത്. പരിക്കേറ്റ ഒരു രോഗിയുമായി എത്തിയ രണ്ട് യുവാക്കൾ ഡോക്ടറോട് മോശമായി പെരുമാറുകയായിരുന്നു.രോഗിയെ ഉടൻ പരിശോധിക്കണമെന്നും മറ്റുള്ളവരെ മാറ്റണമെന്നും ആവശ്യപ്പെട്ടാണ് ഇവർ ബഹളം വെച്ചത്. ഡോക്ടർ കാര്യങ്ങൾ വിശദീകരിക്കാൻ ശ്രമിച്ചെങ്കിലും ഇവർ കേൾക്കാൻ തയ്യാറായില്ല.
വനിതാ ഡോക്ടറെ അസഭ്യം പറയുകയും കൈയ്യേറ്റം ചെയ്യാൻ ശ്രമിക്കുകയും ചെയ്തു. തങ്ങളെ തടയാൻ ശ്രമിച്ചാൽ ഹോസ്പിറ്റലിന് പുറത്തുവെച്ച് കാണിച്ചുതരാമെന്ന് ഇവർ ഭീഷണിപ്പെടുത്തിയതായി പരാതിയിൽ പറയുന്നു.ഡോക്ടറുടെ പരാതിയെത്തുടർന്ന് കുർള പോലീസ് പ്രതികൾക്കെതിരെ ഐപിസിയിലെ വിവിധ വകുപ്പുകൾ പ്രകാരവും ‘മെഡിക്കൽ സർവീസ് പേഴ്സൺസ് ആൻഡ് മെഡിക്കൽ സർവീസ് ഇൻസ്റ്റിറ്റ്യൂഷൻസ് ആക്ട്’ പ്രകാരവും കേസെടുത്തു.
ആശുപത്രി ജീവനക്കാരുടെ സുരക്ഷ ഉറപ്പാക്കണമെന്ന് ആവശ്യപ്പെട്ട് സഹപ്രവർത്തകരായ ഡോക്ടർമാർ രംഗത്തെത്തി. പ്രതികളെ ഉടൻ അറസ്റ്റ് ചെയ്യണമെന്നാണ് ഇവരുടെ ആവശ്യം.
