ന്യൂഡൽഹി: അടുക്കളയിൽ ജോലി ചെയ്യുന്നതിനിടെ സ്വന്തം അമ്മയെ ഓർത്ത് കരഞ്ഞുനിന്ന വീട്ടുജോലിക്കാരിക്ക് സർപ്രൈസ് ജന്മദിനാഘോഷം ഒരുക്കി ഒരു യുവാവും സുഹൃത്തുക്കളും (Man Celebrates House Help Birthday). കൃതാർത്ഥ എന്ന ഇൻസ്റ്റാഗ്രാം ഉപയോക്താവ് പങ്കുവെച്ച ഈ ഹൃദയസ്പർശിയായ വീഡിയോ സോഷ്യൽ മീഡിയയിൽ വൈറലായിരിക്കുകയാണ്.
താൻ സ്നേഹത്തോടെ ‘ദീദി’ എന്ന് വിളിക്കുന്ന ജ്യോതി അടുക്കളയിൽ കരഞ്ഞുനിൽക്കുന്നത് കണ്ടാണ് കൃതാർത്ഥ കാരണം തിരക്കിയത്. ഇന്ന് തന്റെ ജന്മദിനമാണെന്നും അമ്മ ജീവിച്ചിരിപ്പുണ്ടായിരുന്നെങ്കിൽ തന്നെ സ്നേഹിക്കുമായിരുന്നുവെന്നും പറഞ്ഞാണ് ജ്യോതി സങ്കടപ്പെട്ടത്. വളരെ ചെറുപ്പത്തിൽ തന്നെ മാതാപിതാക്കളെ നഷ്ടപ്പെട്ട ജ്യോതിയുടെ വാക്കുകൾ കൃതാർത്ഥയെയും സുഹൃത്തുക്കളെയും ഏറെ വിഷമിപ്പിച്ചു.
തുടർന്ന് ജ്യോതിയുടെ സങ്കടം മാറ്റാനായി അവർ ഒരു കേക്ക് വാങ്ങി ചെറിയ രീതിയിലുള്ള ജന്മദിനാഘോഷം സംഘടിപ്പിക്കുകയായിരുന്നു. ആഘോഷത്തിനിടെ ജ്യോതി കാണിച്ച ഒരു വലിയ മനസ്സ് എല്ലാവരെയും അമ്പരപ്പിച്ചു. തന്റെ കയ്യിലുണ്ടായിരുന്ന 500 രൂപ നൽകി സുഹൃത്തുക്കൾക്ക് ഇഷ്ടമുള്ളത് വാങ്ങി പാർട്ടി നടത്താൻ ജ്യോതി ആവശ്യപ്പെട്ടെങ്കിലും അവർ അത് സ്നേഹപൂർവ്വം നിരസിച്ചു.
സോഷ്യൽ മീഡിയയിൽ വലിയ ചർച്ചകൾക്കാണ് ഈ വീഡിയോ വഴിതെളിച്ചിരിക്കുന്നത്. “ആ ചിരിയിൽ എല്ലാമുണ്ട്”, “ഇതാണ് ഇൻസ്റ്റാഗ്രാമിലെ ഏറ്റവും മികച്ച കാഴ്ച” എന്നിങ്ങനെ നിരവധി കമന്റുകളാണ് വീഡിയോയ്ക്ക് ലഭിക്കുന്നത്. ജ്യോതിയുടെ മുഖത്തെ സന്തോഷം കാണുമ്പോൾ മനസ്സ് നിറയുന്നുവെന്നാണ് പലരും കുറിച്ചത്.
View this post on Instagram
