ബിന്ദ്: മധ്യപ്രദേശിലെ ബിന്ദ് ജില്ലയിൽ ശനിയാഴ്ച പുലർച്ചെയുണ്ടായ വാഹനാപകടത്തിൽ അഞ്ച് പേർ മരിച്ചു (Madhya Pradesh Accident). ഗോഹദ് ചൗരഹ പോലീസ് സ്റ്റേഷൻ പരിധിയിൽ പുലർച്ചെ 2:30-ഓടെയായിരുന്നു അപകടം. അമിതവേഗതയിലെത്തിയ ബസ് വാനിലേക്ക് ഇടിച്ചുകയറുകയായിരുന്നു.
ഭരത് ശർമ്മ, അതുൽ ശിവാരെ, ജഗദീഷ് ബദൗരിയ, പ്രദീപ് പ്രജാപതി, ആനന്ദ് ബദൗരിയ എന്നിവരാണ് അപകടത്തിൽ ജീവൻ നഷ്ടപ്പെട്ടവർ.
നാല് പേർ സംഭവസ്ഥലത്ത് വെച്ചും ഒരാൾ ആശുപത്രിയിൽ ചികിത്സയിലിരിക്കെയുമാണ് മരിച്ചത്. അപകടത്തിൽ പരിക്കേറ്റ ആറ് പേരെ വിദഗ്ധ ചികിത്സയ്ക്കായി ഗ്വാളിയാറിലെ ആശുപത്രിയിലേക്ക് മാറ്റി.
ഗ്വാളിയാറിൽ നിന്നും ബിന്ദിലേക്ക് വരികയായിരുന്ന വാനിലേക്ക്, വിവാഹ സംഘത്തെ ഇറക്കി മടങ്ങുകയായിരുന്ന ബസ് നിയന്ത്രണം വിട്ട് ഇടിക്കുകയായിരുന്നു. അപകടസമയത്ത് ബസിൽ യാത്രക്കാർ ഉണ്ടായിരുന്നില്ല. കൂട്ടിയിടിയുടെ ആഘാതത്തിൽ വാൻ പൂർണ്ണമായും തകർന്നു. അപകടം നടന്നയുടൻ പ്രദേശവാസികളെത്തിയാണ് വാനിൽ കുടുങ്ങിയവരെ പുറത്തെടുത്തത്. അമിതവേഗതയാണ് അപകടത്തിന് കാരണമെന്നാണ് പ്രാഥമിക നിഗമനം.
Story Summary:
Five people died and six others were injured in a tragic collision between a bus and a van in the Bhind district of Madhya Pradesh on Saturday morning due to overspeeding.
