പൂനെ: ടി20 ലോകകപ്പ് വിജയത്തിന് പിന്നാലെ നടന്ന ആഘോഷങ്ങൾക്കിടെ ദേശീയ പതാകയെ അപമാനിച്ചെന്നാരോപിച്ച് ഇന്ത്യൻ ക്രിക്കറ്റ് താരം ഹാർദിക് പാണ്ഡ്യക്കെതിരെ പൂനെ പോലീസിൽ പരാതി. അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടന്ന വിജയാഘോഷ വേളയിൽ പാണ്ഡ്യ ദേശീയ പതാകയോട് അനാദരവ് കാണിച്ചെന്നാണ് ആരോപണം.( Lawyer alleges Hardik Pandya insulted national flag, files police complaint)
അഭിഭാഷകനായ വാജിദ് ഖാനാണ് പൂനെയിലെ ശിവാജി നഗർ പോലീസ് സ്റ്റേഷനിൽ പാണ്ഡ്യക്കെതിരെ പരാതി നൽകിയത്. സ്റ്റേഡിയത്തിലെ ആഘോഷങ്ങൾക്കിടെ ഹാർദിക് പാണ്ഡ്യ ദേശീയ പതാക ശരീരത്തിൽ ചുറ്റുകയും പതാകയുടെ അന്തസ്സിന് നിരക്കാത്ത രീതിയിൽ പെരുമാറുകയും ചെയ്തുവെന്ന് പരാതിയിൽ പറയുന്നു.
ദേശീയ പതാകയുടെ അന്തസ്സ് കാത്തുസൂക്ഷിക്കേണ്ടത് ഓരോ പൗരന്റെയും ഭരണഘടനാപരമായ കടമയാണെന്നും പാണ്ഡ്യയുടെ പ്രവൃത്തി ‘നാഷണൽ ഓണർ ആക്ടിന്റെ’ ലംഘനമാണെന്നും അഭിഭാഷകൻ ചൂണ്ടിക്കാട്ടി. താരത്തിനെതിരെ എഫ്.ഐ.ആർ രജിസ്റ്റർ ചെയ്ത് മാതൃകാപരമായ നിയമനടപടികൾ സ്വീകരിക്കണമെന്നാണ് പരാതിക്കാരന്റെ ആവശ്യം.
