ന്യൂഡൽഹി: എക്സിക്യൂട്ടീവും ജുഡീഷ്യറിയും തമ്മിലുള്ള ബന്ധം എങ്ങനെയായിരിക്കണമെന്നതിന് ചരിത്രത്തിൽ നിന്നൊരു ഉദാഹരണവുമായി ജയറാം രമേശ് രംഗത്തെത്തി. മുന്ദ്ര അഴിമതിയുമായി ബന്ധപ്പെട്ട സംഭവവികാസങ്ങളാണ് അദ്ദേഹം വിവരിച്ചത്.(Jairam Ramesh recalls Jawaharlal Nehru’s respect for the judiciary)
1957-ൽ ഹരിദാസ് മുന്ദ്രയുടെ സ്ഥാപനങ്ങളിൽ എൽ.ഐ.സി നിയമവിരുദ്ധമായി 1.26 കോടി രൂപ നിക്ഷേപിച്ചുവെന്ന ആരോപണത്തെത്തുടർന്ന് അന്നത്തെ ധനമന്ത്രി ടി.ടി. കൃഷ്ണമാചാരിക്ക് രാജിവെക്കേണ്ടി വന്നു. സംഭവത്തെക്കുറിച്ച് അന്വേഷിക്കാൻ ജസ്റ്റിസ് വിവിയൻ ബോസിന്റെ നേതൃത്വത്തിൽ കമ്മീഷനെ നിയോഗിച്ചു. മുന്ദ്ര ഉത്തർപ്രദേശിലെ കോൺഗ്രസിനും എ.ഐ.സി.സിക്കും നൽകിയ സംഭാവനകൾക്ക് പകരമായാണ് ഈ നിക്ഷേപം നടന്നതെന്ന് കമ്മീഷൻ കണ്ടെത്തി.
കമ്മീഷൻ റിപ്പോർട്ടിലെ കണ്ടെത്തലുകളിൽ അതൃപ്തനായ ജവഹർലാൽ നെഹ്റു 1959-ൽ നടത്തിയ ഒരു വാർത്താസമ്മേളനത്തിൽ കടുത്ത ഭാഷയിൽ പ്രതികരിച്ചു. ഒരു ജഡ്ജിയാണെങ്കിൽ പോലും ഇത്തരമൊരു കണ്ടെത്തൽ വിശ്വസിക്കുന്നവർക്ക് ബുദ്ധിയില്ല എന്നായിരുന്നു നെഹ്റുവിന്റെ പരാമർശം. ഇതിനെതിരെ കൽക്കട്ട ബാർ അസോസിയേഷൻ ശക്തമായ പ്രതിഷേധം രേഖപ്പെടുത്തുകയും നെഹ്റുവിനെതിരെ പ്രമേയം പാസാക്കുകയും ചെയ്തു.
എന്നാൽ, ജനാധിപത്യ മൂല്യങ്ങൾ ഉയർത്തിപ്പിടിച്ചുകൊണ്ട് നെഹ്റു ബാർ അസോസിയേഷന് ഖേദപ്രകടനം നടത്തി കത്തയച്ചു. സാഹചര്യത്തിന്റെ സമ്മർദ്ദം മൂലം പറഞ്ഞുപോയ വാക്കുകളാണെന്നും, ആ അനുചിതമായ പരാമർശത്തിന് വ്യക്തിപരമായി ക്ഷമ ചോദിക്കുന്നു എന്നും നെഹ്റു കത്തിൽ വ്യക്തമാക്കി. ഭരണഘടനാ സ്ഥാപനങ്ങൾ തമ്മിലുള്ള ബന്ധത്തെക്കുറിച്ച് അത്രമേൽ ബോധവാനായിരുന്ന ഒരു ഭരണാധികാരിയായിരുന്നു നെഹ്റുവെന്ന് ജയറാം രമേശ് പറഞ്ഞു.
