ജയ്പുർ: രാജസ്ഥാൻ തലസ്ഥാനമായ ജയ്പൂരിൽ ശനിയാഴ്ച പുലർച്ചെയുണ്ടായ വാഹനാപകടത്തിൽ അഞ്ച് പേർക്ക് ദാരുണാന്ത്യം (Jaipur Road Accident). ജയ്പൂരിലെ ചക്സു പ്രവിശ്യയിലുള്ള ടിഗാഡിയയിലാണ് അപകടം നടന്നത്. നിയന്ത്രണം വിട്ട കാർ ട്രക്കുമായി കൂട്ടിയിടിക്കുകയായിരുന്നു.
ഇന്ന് പുലർച്ചെ ആറുമണിയോടെയാണ് അപകടം ശ്രദ്ധയിൽപ്പെട്ടത്. അമിതവേഗതയിലെത്തിയ കാർ നിയന്ത്രണം വിട്ട് എതിരെ വന്ന ട്രക്കിലേക്ക് ഇടിച്ചുകയറുകയായിരുന്നുവെന്നാണ് പ്രാഥമിക നിഗമനം. അപകടത്തിൽ നാല് പേർ സംഭവസ്ഥലത്തുതന്നെ മരണപ്പെട്ടു. ഗുരുതരമായി പരിക്കേറ്റ ഒരാളെ ഉടൻ ആശുപത്രിയിൽ എത്തിച്ചെങ്കിലും ചികിത്സയിലിരിക്കെ മരണത്തിന് കീഴടങ്ങുകയായിരുന്നു.
മരിച്ചവരെ തിരിച്ചറിയാനുള്ള ശ്രമങ്ങൾ പോലീസ് തുടരുകയാണ്. മൃതദേഹങ്ങൾ പോസ്റ്റ്മോർട്ടത്തിനായി ചക്സു ജില്ലാ ആശുപത്രിയിലേക്ക് മാറ്റി. അപകടത്തെത്തുടർന്ന് റോഡിൽ ഗതാഗത തടസ്സമുണ്ടായെങ്കിലും പോലീസ് എത്തി വാഹനങ്ങൾ നീക്കം ചെയ്തു. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.
