ന്യൂഡൽഹി: രാജ്യത്ത് ഇന്ധന വിതരണം സുസ്ഥിരമാണെന്നും പെട്രോൾ പമ്പുകൾ സാധാരണ നിലയിൽ പ്രവർത്തിക്കുന്നുണ്ടെന്നും കേന്ദ്ര പെട്രോളിയം മന്ത്രാലയം (India Fuel Supply Update 2026). പശ്ചിമേഷ്യൻ സംഘർഷത്തിന്റെ പശ്ചാത്തലത്തിൽ ഇന്ധനക്ഷാമം ഉണ്ടാകുമെന്ന തരത്തിലുള്ള വ്യാജവാർത്തകളിൽ വിശ്വസിച്ച് ജനങ്ങൾ പരിഭ്രാന്തരാകരുതെന്ന് സർക്കാർ അഭ്യർത്ഥിച്ചു. എല്ലാ പമ്പുകളിലും ആവശ്യത്തിന് പെട്രോൾ, ഡീസൽ ശേഖരമുണ്ടെന്നും റിഫൈനറികൾ പൂർണ്ണ ശേഷിയിൽ പ്രവർത്തിക്കുന്നുണ്ടെന്നും മന്ത്രാലയം വ്യക്തമാക്കി.
ഹോർമുസ് കടലിടുക്ക് അടഞ്ഞു കിടക്കുന്നത് ചരക്ക് നീക്കത്തെ ബാധിച്ചിട്ടുണ്ടെങ്കിലും അത് മറികടക്കാനുള്ള ശ്രമങ്ങൾ തുടരുകയാണ്.
ആശുപത്രികൾ, സ്കൂൾ കാന്റീനുകൾ, കമ്മ്യൂണിറ്റി കിച്ചണുകൾ എന്നിവയെ സഹായിക്കാൻ വാണിജ്യ എൽ.പി.ജി വിഹിതം 50 ശതമാനമായി സർക്കാർ ഉയർത്തി. എൽ.പി.ജി ഉപയോഗം കുറയ്ക്കുന്നതിനായി സംസ്ഥാനങ്ങൾക്ക് 48,000 കിലോ ലിറ്റർ അധിക മണ്ണെണ്ണ അനുവദിച്ചു. കരിഞ്ചന്തയും പൂഴ്ത്തിവെപ്പും തടയാൻ സംസ്ഥാനങ്ങൾക്ക് കർശന നിർദ്ദേശം നൽകിയിട്ടുണ്ട്- സർക്കാർ വ്യക്തമാക്കി.
പശ്ചിമേഷ്യയിലുള്ള ഇന്ത്യക്കാരുടെ സുരക്ഷയ്ക്കാണ് മുൻഗണനയെന്നും സർക്കാർ അറിയിച്ചു. ഫെബ്രുവരി 28 മുതൽ ഏകദേശം 4.5 ലക്ഷം പേർ ഇന്ത്യയിൽ തിരിച്ചെത്തിയിട്ടുണ്ട്. ഇന്ത്യൻ കപ്പലുകൾക്കോ നാവികർക്കോ നിലവിൽ ഭീഷണിയൊന്നുമില്ലെന്നും തുറമുഖങ്ങൾ തടസ്സമില്ലാതെ പ്രവർത്തിക്കുന്നുണ്ടെന്നും കേന്ദ്രം വ്യക്തമാക്കി.
നിർമ്മാണ മേഖലയിൽ വിലക്കയറ്റ ഭീതി
ഇന്ധന വിതരണം സാധാരണ നിലയിലാണെന്ന് സർക്കാർ പറയുമ്പോഴും വിപണിയിൽ വിലക്കയറ്റ ഭീതി ശക്തമാണ്. കഴിഞ്ഞ തിങ്കളാഴ്ച മുതൽ നിർമ്മാണ സാമഗ്രികളുടെ വിലയിൽ വർദ്ധനവ് രേഖപ്പെടുത്തിയിട്ടുണ്ട്. കേരളത്തിലെ ഔട്ട്ലെറ്റുകളിൽ ടൈലുകൾ അതിവേഗത്തിലാണ് വിറ്റഴിയുന്നത്. നിലവിലെ സ്റ്റോക്ക് തീരുന്നതോടെ പുതിയ സ്റ്റോക്കുകൾക്ക് ഉയർന്ന വില നൽകേണ്ടി വരുമെന്നതിനാൽ പലയിടത്തും ‘ഔട്ട് ഓഫ് സ്റ്റോക്ക്’ ബോർഡുകൾ പ്രത്യക്ഷപ്പെട്ടു കഴിഞ്ഞു.
നയാര (Nayara) പോലുള്ള സ്വകാര്യ കമ്പനികൾ ഇന്ധനവില വർദ്ധിപ്പിച്ചത് മറ്റ് പൊതുമേഖലാ കമ്പനികളെയും സമാനമായ തീരുമാനത്തിലേക്ക് നയിക്കുമോ എന്ന ആശങ്കയിലാണ് ഉപഭോക്താക്കൾ.
Short Story Summary:
The Central Government has assured that India has sufficient fuel reserves and urged citizens not to panic buy based on fake news. While the closure of the Strait of Hormuz poses challenges, refineries are working at full capacity. To manage the crisis, commercial LPG quotas for essential sectors have been hiked by 50%, and extra kerosene has been allotted to states. Meanwhile, over 4.5 lakh Indians have returned from West Asia. Despite assurances, the market is seeing a price hike in construction materials like tiles, and private fuel companies have already started increasing prices.
