ജയ്പൂർ: ഭർത്താവിന്റെ ശമ്പള വിവരങ്ങൾ അറിയാൻ വിവരാവകാശ നിയമപ്രകാരം ഭാര്യയ്ക്ക് അവകാശമില്ലെന്ന് രാജസ്ഥാൻ ഹൈക്കോടതി വിധിച്ചു. വ്യക്തിഗത സ്വഭാവമുള്ള ഇത്തരം വിവരങ്ങൾ വെളിപ്പെടുത്തുന്നത് പൊതുതാൽപ്പര്യത്തിന്റെ പരിധിയിൽ വരില്ലെന്ന് കോടതി നിരീക്ഷിച്ചു. വിവരാവകാശ അപേക്ഷ നിരസിച്ച നടപടിയെ ചോദ്യം ചെയ്ത് ഭാര്യ സമർപ്പിച്ച ഹർജി തള്ളിക്കൊണ്ടാണ് ജസ്റ്റിസ് കുൽദീപ് മാത്തൂർ ഉത്തരവിട്ടത്.(Husband’s salary details cannot be given to wife under RTI, states Rajasthan High Court)
ഭിൽവാരയിലെ പോലീസ് വകുപ്പിൽ ജോലി ചെയ്യുന്ന ഭർത്താവിന്റെ ശമ്പള സ്ലിപ്പുകളുടെയും മറ്റ് വരുമാന വിവരങ്ങളുടെയും പകർപ്പുകൾ ആവശ്യപ്പെട്ടാണ് ഭാര്യ വിവരാവകാശ അപേക്ഷ നൽകിയത്. ഈ വിവരങ്ങൾ മൂന്നാം കക്ഷിയുമായി ബന്ധപ്പെട്ടതാണെന്നും വ്യക്തിഗതമാണെന്നും ചൂണ്ടിക്കാട്ടി വിവരാവകാശ കമ്മീഷൻ അപേക്ഷ തള്ളിയിരുന്നു.
കമ്മീഷന്റെ തീരുമാനത്തിൽ നിയമവിരുദ്ധമായി ഒന്നുമില്ലെന്ന് ഹൈക്കോടതി വ്യക്തമാക്കി. ഒരു സ്ഥാപനത്തിലെ ജീവനക്കാരന്റെ ശമ്പള വിവരങ്ങളും പ്രവർത്തന റിപ്പോർട്ടുകളും തൊഴിലുടമയും ജീവനക്കാരനും തമ്മിലുള്ള സ്വകാര്യ വിഷയമാണ്. ഇത് വിവരാവകാശ നിയമത്തിലെ 8(1)(j) വകുപ്പ് പ്രകാരം വ്യക്തിഗത വിവരങ്ങളുടെ പരിധിയിൽ വരുന്നു. ഇത്തരം വിവരങ്ങൾ വെളിപ്പെടുത്തുന്നത് കൊണ്ട് എന്ത് പൊതുതാൽപ്പര്യമാണ് ഉള്ളതെന്ന് തെളിയിക്കാൻ ഹർജിക്കാരിക്ക് കഴിഞ്ഞില്ല. അഴിമതിയോ പൊതുമുതൽ ദുരുപയോഗമോ ആരോപിക്കപ്പെടുന്ന സാഹചര്യങ്ങളിൽ മാത്രമേ ഇത്തരം വിവരങ്ങൾ നൽകേണ്ടതുള്ളൂ.
