ചണ്ഡീഗഢ്: പഞ്ചാബ് കോൺഗ്രസിനെ പ്രതിസന്ധിയിലാക്കി നവ്ജ്യോത് കൗർ സിദ്ധു പാർട്ടിയിൽ നിന്ന് രാജിവെച്ചു. പാർട്ടി സംസ്ഥാന അധ്യക്ഷൻ അമരീന്ദർ സിംഗ് രാജാ വാറിങ്ങിനെതിരെ രൂക്ഷമായ ആരോപണങ്ങൾ ഉന്നയിച്ചുകൊണ്ടാണ് അവർ കോൺഗ്രസ് വിടുന്നതായി പ്രഖ്യാപിച്ചത്.(Huge clash in Punjab Congress, Navjot Kaur Sidhu leaves the party)
കോൺഗ്രസ് കണ്ടിട്ടുള്ളതിൽ വെച്ച് ഏറ്റവും അഴിമതിക്കാരനും കഴിവുകെട്ടവനുമായ പ്രസിഡന്റാണ് രാജാ വാറിങ്ങെന്ന് നവ്ജ്യോത് കൗർ കുറ്റപ്പെടുത്തി. അഴിമതിക്കേസുകളിൽ നിന്ന് രക്ഷപ്പെടാൻ രാജാ വാറിങ് ഭരണകക്ഷിയായ ആം ആദ്മി പാർട്ടിയുമായി ചേർന്ന് കോൺഗ്രസിനെ തകർക്കാൻ ശ്രമിക്കുകയാണെന്ന് അവർ എക്സിൽ കുറിച്ചു.
പ്രധാനമന്ത്രി നരേന്ദ്ര മോദിയുടെ പഞ്ചാബ് സന്ദർശനത്തെ സ്വാഗതം ചെയ്തുകൊണ്ടുള്ള പ്രതികരണത്തിന് പിന്നാലെയാണ് രാജി എന്നതും ശ്രദ്ധേയമാണ്. നമ്മുടെ രാജ്യത്തിന്റെ തലവൻ സംസ്ഥാനത്തിന് എന്തെങ്കിലും നൽകാൻ എത്തുമ്പോൾ അതിനെ എതിർക്കുന്നവർ രാഷ്ട്രീയ കള്ളന്മാരാണ് എന്നാണ് അവർ കുറിച്ചത്.
