ഗുരുഗ്രാം ആസ്ഥാനമായി പ്രവർത്തിക്കുന്ന ഒരു സ്റ്റാർട്ടപ്പ് സ്ഥാപകൻ, വീട്ടിലിരുന്ന് ജോലി ചെയ്യാൻ അനുവാദം ചോദിച്ച ജീവനക്കാരനെ രണ്ട് മിനിറ്റിനുള്ളിൽ പിരിച്ചുവിട്ടത് സോഷ്യൽ മീഡിയയിൽ വലിയ ചർച്ചയാകുന്നു (Gurugram Founder Fires Employee). സ്റ്റാർട്ടപ്പ് സ്ഥാപകർക്കായുള്ള ‘ദി 15’ എന്ന നെറ്റ്വർക്കിംഗ് പ്ലാറ്റ്ഫോമിന്റെ സ്ഥാപകൻ നിഖിൽ റാണയാണ് ഈ നടപടി സ്വീകരിച്ചത്. താൻ ജീവനക്കാരനെ പിരിച്ചുവിട്ട വാട്ട്സ്ആപ്പ് ചാറ്റിന്റെ സ്ക്രീൻഷോട്ട് അദ്ദേഹം തന്നെ ലിങ്ക്ഡ്ഇന്നിൽ പങ്കുവെച്ചതോടെയാണ് സംഭവം പുറംലോകമറിഞ്ഞത്.
ഓഫീസിൽ വരാൻ കഴിയില്ലെന്നും വീട്ടിലിരുന്ന് ജോലി ചെയ്യാൻ അനുവദിക്കണമെന്നും അഭ്യർത്ഥിച്ച് ജീവനക്കാരൻ സന്ദേശമയച്ചു. എന്നാൽ രണ്ട് മിനിറ്റിനുള്ളിൽ മറുപടി നൽകിയ നിഖിൽ റാണ, ആ ദിവസം തന്നെ ജീവനക്കാരന്റെ അവസാന പ്രവൃത്തിദിവസമായിരിക്കുമെന്നും ജോലിയിൽ നിന്ന് പിരിച്ചുവിട്ടതായും അറിയിക്കുകയായിരുന്നു. നോട്ടീസ് പിരീഡ് എന്നത് വെറും നാടകമാണെന്നും സമയനഷ്ടമാണെന്നും താൻ വിശ്വസിക്കുന്നതായി റാണ ലിങ്ക്ഡ്ഇൻ പോസ്റ്റിൽ കുറിച്ചു. സ്റ്റാർട്ടപ്പുകൾക്ക് ഉത്തരവാദിത്തബോധമുള്ളവരും ഏത് സാഹചര്യത്തിലും ജോലി പൂർത്തിയാക്കാൻ കഴിവുള്ളവരുമായ ആളുകളെയാണ് ആവശ്യമെന്നും അദ്ദേഹം വാദിച്ചു. ഇന്നത്തെ കാലത്ത് പ്രൊഫഷണൽ സ്കില്ലുകൾക്ക് ആരും വില കൽപ്പിക്കുന്നില്ലെന്നും പകരം ആത്മാർത്ഥതയ്ക്കാണ് മുൻഗണന നൽകുന്നതെന്നും അദ്ദേഹം കൂട്ടിച്ചേർത്തു.
റാണയുടെ നടപടിക്കെതിരെ കടുത്ത വിമർശനമാണ് ഉയരുന്നത്. ജീവനക്കാരോട് കുറഞ്ഞ പക്ഷം സഹാനുഭൂതി കാണിക്കണമെന്നും ഒരു ദിവസത്തെ ആവശ്യത്തെ ഇത്തരത്തിൽ നേരിടുന്നത് ശരിയല്ലെന്നും പലരും അഭിപ്രായപ്പെട്ടു. എന്നാൽ, സ്റ്റാർട്ടപ്പ് സംസ്കാരത്തിൽ കഠിനാധ്വാനവും അർപ്പണബോധവുമാണ് പ്രധാനമെന്ന് പറഞ്ഞ് നിഖിൽ റാണയെ പിന്തുണയ്ക്കുന്നവരും കുറവല്ല. ജോലിസ്ഥലത്തെ അച്ചടക്കവും ജീവനക്കാരുടെ അവകാശങ്ങളും തമ്മിലുള്ള സന്തുലിതാവസ്ഥയെക്കുറിച്ച് വലിയ സംവാദങ്ങൾക്കാണ് ഈ സംഭവം വഴിവെച്ചിരിക്കുന്നത്. ഉടമയുടെ നടപടി ക്രൂരമാണെന്ന് ഒരു വിഭാഗം വാദിക്കുമ്പോൾ, സ്ഥാപനത്തിന്റെ വളർച്ചയ്ക്ക് ഇത്തരം കർക്കശമായ തീരുമാനങ്ങൾ അത്യാവശ്യമാണെന്നാണ് മറുവിഭാഗത്തിന്റെ പക്ഷം.
