2028 മുതൽ ടൂ വീലറുകൾ രജിസ്റ്റർ ചെയ്യാനാവില്ല, ഇലക്ട്രിക് മാത്രം; കടുത്ത നിർദേശങ്ങളുമായി ഡൽഹിയുടെ പുതിയ വാഹന നയം | Delhi New Electric Vehicle Policy

ന്യൂഡൽഹി: തലസ്ഥാന നഗരിയിലെ വായുമലിനീകരണം തടയുന്നതിനായി വിപ്ലവകരമായ നിർദ്ദേശങ്ങളുമായി ഡൽഹി സർക്കാർ പുതിയ ഇലക്ട്രിക് വാഹന നയത്തിന്റെ കരട് പുറത്തിറക്കി. 2028 ഏപ്രിൽ 1 മുതൽ ഡൽഹിയിൽ പുതിയ പെട്രോൾ ടൂ-വീലറുകളുടെ രജിസ്ട്രേഷൻ പൂർണ്ണമായും നിർത്തലാക്കാനാണ് സർക്കാർ തീരുമാനം (Delhi New Electric Vehicle Policy). ഇതോടെ പുതിയതായി ടൂ-വീലറുകൾ വാങ്ങുന്നവർ ഇലക്ട്രിക് മോഡലുകൾ തന്നെ തിരഞ്ഞെടുക്കേണ്ടി വരും. ട്രാൻസ്പോർട്ട് ഡിപ്പാർട്ട്‌മെന്റ് പുറത്തിറക്കിയ ഈ കരട് നയത്തിൽ പൊതുജനങ്ങൾക്ക് അഭിപ്രായം അറിയിക്കാൻ 30 ദിവസത്തെ സമയം അനുവദിച്ചിട്ടുണ്ട്.

പുതിയ നയം അനുസരിച്ച്, 2027 ജനുവരി 1 മുതൽ ത്രീ-വീലറുകൾ ഇലക്ട്രിക് മോഡലുകൾ മാത്രമായിരിക്കും രജിസ്റ്റർ ചെയ്യുക. വാണിജ്യ വാഹനങ്ങൾക്കും കടുത്ത നിയന്ത്രണങ്ങളുണ്ട്. ഡെലിവറി സർവീസുകൾക്കായി ഉപയോഗിക്കുന്ന വാഹനങ്ങൾ 2026 ജനുവരി മുതൽ ഇലക്ട്രിക് മാത്രമായിരിക്കണം. സ്കൂൾ ബസുകൾ ഘട്ടംഘട്ടമായി ഇലക്ട്രിക് ആക്കുന്നതിനൊപ്പം സർക്കാർ ആവശ്യങ്ങൾക്കായി വാടകയ്ക്ക് എടുക്കുന്ന വാഹനങ്ങൾ ഇനി മുതൽ 100 ശതമാനവും ഇലക്ട്രിക് ആയിരിക്കണമെന്നും കരട് നയത്തിൽ നിർദ്ദേശിക്കുന്നു.

ഇലക്ട്രിക് വാഹനങ്ങൾ വാങ്ങുന്നവരെ പ്രോത്സാഹിപ്പിക്കുന്നതിനായി വൻ സബ്‌സിഡികളും ടാക്സ് ഇളവുകളുമാണ് സർക്കാർ വാഗ്ദാനം ചെയ്യുന്നത്. പഴയ വാഹനങ്ങൾ പൊളിക്കാൻ നൽകുന്നവർക്ക് 10,000 രൂപ മുതൽ ഒരു ലക്ഷം രൂപ വരെ സ്ക്രാപ്പേജ് ഇൻസെന്റീവ് ലഭിക്കും. കൂടാതെ റോഡ് ടാക്സ്, രജിസ്ട്രേഷൻ ഫീ എന്നിവയിൽ ഇലക്ട്രിക് വാഹനങ്ങൾക്ക് പൂർണ്ണ ഇളവ് നൽകാനും നിർദ്ദേശമുണ്ട്. ചാർജിംഗ് സൗകര്യങ്ങൾ വർധിപ്പിക്കുന്നതിനായി ഡീലർഷിപ്പുകളിൽ ചാർജിംഗ് പോയിന്റുകൾ നിർബന്ധമാക്കും. വായുമലിനീകരണം കുറയ്ക്കുന്നതിനൊപ്പം തലസ്ഥാനത്തെ പരിസ്ഥിതി സൗഹൃദ ഗതാഗത കേന്ദ്രമായി മാറ്റാനാണ് സർക്കാർ ലക്ഷ്യമിടുന്നത്.

Summary: The Delhi government has released a draft for its new Electric Vehicle (EV) policy aimed at curbing air pollution. According to the proposal, the registration of new petrol two-wheelers will be banned starting April 1, 2028, making only electric models eligible. Commercial delivery vehicles must switch to electric by January 2026, and school buses will be electrified in phases. To promote EVs, the government is offering subsidies, tax exemptions, and scrap incentives ranging from ₹10,000 to ₹1,00,000.