ന്യൂഡൽഹി: ചരിത്രപ്രധാനമായ ആസ്ഥാനമന്ദിരം ഒഴിയണമെന്ന കേന്ദ്ര സർക്കാർ നോട്ടീസിൽ കോൺഗ്രസിന് അവസാന നിമിഷം താൽക്കാലിക ആശ്വാസം. 24, അക്ബർ റോഡിലെ ഐക്കണിക് ബംഗ്ലാവ് മാർച്ച് 28-നകം ഒഴിഞ്ഞുനൽകണമെന്ന് കാട്ടി കേന്ദ്ര എസ്റ്റേറ്റ് ഡയറക്ടറേറ്റ് കഴിഞ്ഞ ദിവസമാണ് നോട്ടീസ് നൽകിയിരുന്നത്. എന്നാൽ, ഇതിൽ താൽക്കാലിക ഇളവ് ലഭിച്ചതായാണ് സൂചന.(Congress to get temporary relief from vacating 24 Akbar Road office)
മുതിർന്ന കോൺഗ്രസ് നേതാക്കൾ കേന്ദ്ര സർക്കാരുമായി നടത്തിയ ചർച്ചകളെത്തുടർന്നാണ് നടപടികളിൽ ഇളവ് ലഭിച്ചതെന്ന് റിപ്പോർട്ടുകൾ സൂചിപ്പിക്കുന്നു. ഇതനുസരിച്ച് അടുത്ത ആറ് മാസത്തേക്ക് കൂടി ഓഫീസ് നിലനിർത്താൻ പാർട്ടിക്ക് കഴിഞ്ഞേക്കും. രാജസ്ഥാൻ മുൻ മുഖ്യമന്ത്രി അശോക് ഗെലോട്ട്, മുതിർന്ന നേതാവ് അജയ് മാക്കൻ എന്നിവരാണ് സർക്കാർ പ്രതിനിധികളുമായി ചർച്ചകൾക്ക് നേതൃത്വം നൽകിയതെന്നാണ് വിവരം.
കഴിഞ്ഞ വർഷം ജനുവരി 15-നാണ് കോൺഗ്രസ് തങ്ങളുടെ പുതിയ ആസ്ഥാനമായ ‘ഇന്ദിരാ ഭവനിലേക്ക്’ ഔദ്യോഗികമായി മാറിയത്. ഇതിനു പിന്നാലെയാണ് പഴയ ബംഗ്ലാവുകൾ തിരികെ നൽകാൻ എസ്റ്റേറ്റ് വകുപ്പ് നിർദ്ദേശം നൽകിയത്. അക്ബർ റോഡിലെ എഐസിസി ആസ്ഥാനത്തിന് പുറമെ, 5 റെയ്സീന റോഡിലെ ഇന്ത്യൻ യൂത്ത് കോൺഗ്രസ് ഓഫീസിനും സമാനമായ നോട്ടീസ് ലഭിച്ചിരുന്നു.
