ന്യൂഡൽഹി: അമേരിക്കയും ഇറാനും തമ്മിലുള്ള സൈനിക സംഘർഷം രൂക്ഷമായ സാഹചര്യത്തിൽ രാജ്യത്തെ ആഭ്യന്തര വ്യവസായ മേഖലയെ സംരക്ഷിക്കാൻ നിർണ്ണായക നീക്കവുമായി കേന്ദ്ര സർക്കാർ (Import Duty Waiver India). പ്ലാസ്റ്റിക്, ഔഷധ നിർമ്മാണം, ടെക്സ്റ്റൈൽ തുടങ്ങിയ മേഖലകളിൽ അസംസ്കൃത വസ്തുക്കളായി ഉപയോഗിക്കുന്ന പ്രധാന പെട്രോകെമിക്കൽ ഉൽപ്പന്നങ്ങളുടെ ഇറക്കുമതി തീരുവ (Import Duty) പൂർണ്ണമായും ഒഴിവാക്കി. വിപണിയിലെ വിലക്കയറ്റം തടയുക ലക്ഷ്യമിട്ടുള്ള ഈ ആനുകൂല്യം 2026 ജൂൺ 30 വരെ നിലനിൽക്കുമെന്ന് ധനമന്ത്രാലയം അറിയിച്ചു.
മെഥനോൾ, അസറ്റിക് ആസിഡ്, ഫിനോൾ, ടൊളുവിൻ, സ്റ്റൈറീൻ തുടങ്ങിയ കെമിക്കലുകൾക്കും പോളിപ്രൊപ്പിലീൻ, പിവിസി (PVC), പോളിസ്റ്റൈറീൻ തുടങ്ങിയ പ്ലാസ്റ്റിക് നിർമ്മാണ വസ്തുക്കൾക്കും ഇളവ് ബാധകമാണ്. പ്ലാസ്റ്റിക് പാക്കേജിംഗ്, തുണിത്തരങ്ങൾ, വാഹന നിർമ്മാണം, മരുന്നുകൾ തുടങ്ങിയവയുടെ ഉത്പാദനച്ചെലവ് കുറയ്ക്കുക വഴി നിത്യോപയോഗ സാധനങ്ങളുടെ വില നിയന്ത്രിക്കുക. ഹോർമുസ് കടലിടുക്ക് വഴിയുള്ള ചരക്ക് നീക്കം തടസ്സപ്പെട്ടതും ആഗോള വിതരണ ശൃംഖലയിലുണ്ടായ പ്രതിസന്ധിയും ചരക്ക് കൂലി വർദ്ധനവും ഇന്ത്യൻ വ്യവസായങ്ങളെ ബാധിക്കാതിരിക്കാനാണ് ഈ അടിയന്തര നടപടി.
യുദ്ധം കാരണം അസംസ്കൃത വസ്തുക്കളുടെ ഇറക്കുമതി തടസ്സപ്പെടുന്നത് ഉത്പാദന മേഖലയെ സ്തംഭിപ്പിക്കുമെന്ന ആശങ്ക നിലനിൽക്കെയാണ് കേന്ദ്രത്തിന്റെ ഈ ഇടപെടൽ. ഇത് ചെറുകിട-ഇടത്തരം വ്യവസായങ്ങൾക്ക് വലിയ ആശ്വാസമാകുമെന്നാണ് വിലയിരുത്തൽ.
Story Summary:
To protect domestic industries amidst the escalating US-Iran conflict, the Indian government has completely waived import duties on key petrochemical products, including raw materials for plastics, pharmaceuticals, and textiles. This exemption, aimed at curbing inflation and supporting manufacturing, will remain in effect until June 30, 2026. The move follows disruptions in global supply chains and rising freight costs due to the crisis in the Strait of Hormuz.
