ബെംഗളൂരു: ബെംഗളൂരുവിലെ വീട് വാടക കുതിച്ചുയരുന്നതിനിടയിൽ, വിചിത്രമായ കാരണങ്ങൾ പറഞ്ഞ് വാടക വർദ്ധിപ്പിക്കുന്ന ഉടമയുടെ നടപടി വാർത്തയാകുന്നു (Bengaluru House Rent). സർജാപുരിലെ ഒരു ഫ്ലാറ്റിന് മാസം 80,000 രൂപ വാടക ചോദിച്ച ഉടമയുടെ ന്യായീകരണമാണ് ഇപ്പോൾ സോഷ്യൽ മീഡിയയിൽ ചിരിയും പ്രതിഷേധവും ഉയർത്തുന്നത്.
ഫ്ലാറ്റിനുള്ളിലേക്ക് ആവശ്യത്തിന് സൂര്യപ്രകാശം ലഭിക്കുന്നുണ്ടെന്നും (Sunlight-facing flat) കാറ്റും വെളിച്ചവുമുള്ള മുറികളായതിനാലുമാണ് ഇത്രയും ഉയർന്ന വാടക ചോദിക്കുന്നതെന്നാണ് ഉടമയുടെ വാദം. ‘എക്സ്’ (X) പ്ലാറ്റ്ഫോമിൽ ഒരാൾ പങ്കുവെച്ച ഈ പോസ്റ്റ് നിമിഷങ്ങൾക്കകം വൈറലായി. “ഇനി ശുദ്ധവായു ശ്വസിക്കുന്നതിനും ഉടമകൾ ചാർജ് ഈടാക്കുമോ?” എന്നാണ് പലരും പരിഹാസരൂപേണ ചോദിക്കുന്നത്.
ഐടി മേഖലയായ സർജാപുരിലെ 2BHK ഫ്ലാറ്റുകൾക്ക് സാധാരണ 40,000 – 50,000 രൂപയാണ് വാടകയെന്നിരിക്കെയാണ് സൂര്യപ്രകാശത്തിന്റെ പേരിൽ ഉടമ 80,000 രൂപ ആവശ്യപ്പെട്ടത്. നഗരത്തിൽ ഡിമാൻഡ് വർദ്ധിക്കുന്നതിനനുസരിച്ച് വാടകക്കാർ നേരിടുന്ന ദുരനുഭവങ്ങളുടെ അവസാനത്തെ ഉദാഹരണമാണിത്. ഇന്റർവ്യൂവിന് സമാനമായ നടപടിക്രമങ്ങൾക്ക് ശേഷമേ പലപ്പോഴും ബെംഗളൂരുവിൽ ഇപ്പോൾ വീട് ലഭിക്കുന്നുള്ളൂ.
