ന്യൂഡൽഹി: ഡൽഹി മദ്യനയവുമായി ബന്ധപ്പെട്ട അഴിമതിക്കേസിൽ മുൻ മുഖ്യമന്ത്രിയും എ.എ.പി അധ്യക്ഷനുമായ അരവിന്ദ് കെജ്രിവാളിനെയും മനീഷ് സിസോദിയയെയും കോടതി വെറുതെ വിട്ടു (Arvind Kejriwal Manish Sisodia Discharged Liquor Policy Case). വെള്ളിയാഴ്ച ഡൽഹിയിലെ റൗസ് അവന്യൂ കോടതിയാണ് കേസിൽ ഉൾപ്പെട്ട 23 പ്രതികളെയും കുറ്റവിമുക്തരാക്കിയത്. മതിയായ തെളിവുകളില്ലാതെയാണ് പ്രതികളെ ഉൾപ്പെടുത്തിയതെന്ന് നിരീക്ഷിച്ച കോടതി, സി.ബി.ഐയുടെ അന്വേഷണത്തിലെ പോരായ്മകളെ അതിരൂക്ഷമായ ഭാഷയിൽ വിമർശിച്ചു.
ആയിരക്കണക്കിന് പേജുകളുള്ള കുറ്റപത്രത്തിൽ സാക്ഷികളോ തെളിവുകളോ പിന്തുണയ്ക്കാത്ത കാര്യങ്ങളാണ് ഉൾപ്പെടുത്തിയിരിക്കുന്നതെന്ന് സ്പെഷ്യൽ ജഡ്ജി ജിതേന്ദർ സിംഗ് പറഞ്ഞു. അരവിന്ദ് കെജ്രിവാളിനെതിരെ വ്യക്തമായ തെളിവുകളൊന്നുമില്ലാതെയാണ് ഗൂഢാലോചനാക്കുറ്റം ചുമത്തിയതെന്നും ഒരു ഭരണഘടനാ പദവി വഹിക്കുന്ന വ്യക്തിക്കെതിരെ ഇത്തരം നടപടികൾ നിയമവാഴ്ചയ്ക്ക് നിരക്കാത്തതാണെന്നും കോടതി നിരീക്ഷിച്ചു. മനീഷ് സിസോദിയയ്ക്കെതിരെയുള്ള ആരോപണങ്ങൾ പ്രഥമദൃഷ്ട്യാ നിലനിൽക്കില്ലെന്നും അദ്ദേഹത്തിൽ നിന്ന് പണമൊന്നും കണ്ടെടുത്തിട്ടില്ലെന്നും ജഡ്ജി വ്യക്തമാക്കി.
സി.ബി.ഐ കുറ്റപത്രത്തിൽ ആന്തരിക വൈരുദ്ധ്യങ്ങൾ ഉണ്ടെന്നും ഇത് ഗൂഢാലോചനാ സിദ്ധാന്തത്തിന്റെ അടിസ്ഥാനത്തെ തന്നെ ബാധിക്കുന്നുവെന്നും കോടതി ചൂണ്ടിക്കാട്ടി. ഒന്നാം പ്രതിയായി ചേർക്കപ്പെട്ട കുൽദീപ് സിംഗിനെതിരെ പോലും യാതൊരു തെളിവുമില്ലാതിരുന്നിട്ടും അദ്ദേഹത്തെ പ്രതിയാക്കിയത് അത്ഭുതകരമാണെന്നും കോടതി പറഞ്ഞു. ഈ വിധി ആം ആദ്മി പാർട്ടിക്ക് വലിയ രാഷ്ട്രീയ വിജയമായാണ് വിലയിരുത്തപ്പെടുന്നത്. മുതിർന്ന അഭിഭാഷകൻ എൻ. ഹരിഹരൻ, അഭിഭാഷകൻ മുദിത് ജെയിൻ എന്നിവരാണ് കെജ്രിവാളിന് വേണ്ടി ഹാജരായത്.
Summary: A Delhi Court has discharged former CM Arvind Kejriwal, Manish Sisodia, and 22 others in the liquor policy corruption case due to a lack of evidence.
