മുംബൈ: എൺപതുകളിൽ പുറത്തിറങ്ങിയ ‘മംഗൾസൂത്ര’ എന്ന ചിത്രത്തിൽ നിന്ന് തന്നെ ഒഴിവാക്കാൻ നടി രേഖ ആവശ്യപ്പെട്ടിരുന്നു എന്ന വെളിപ്പെടുത്തലുമായി മുതിർന്ന നടി അരുണ ഇറാനി (Mangalsutra Controversy). അടുത്ത സുഹൃത്തുക്കളായിരുന്നിട്ടും രേഖ ഇത്തരമൊരു നിലപാട് എടുത്തത് തന്നെ അത്ഭുതപ്പെടുത്തിയെന്ന് അരുണ ഇറാനി ഒരു അഭിമുഖത്തിൽ പറഞ്ഞു. ചിത്രത്തിൽ അഭിനയിക്കാൻ കരാറൊപ്പിട്ട ശേഷം ഷൂട്ടിംഗ് വിവരങ്ങൾ ഒന്നും തന്നെ അറിയിച്ചില്ലെന്നും പകരക്കാരിയെ വെച്ച കാര്യം പത്രത്തിലൂടെയാണ് അറിഞ്ഞതെന്നും താരം വെളിപ്പെടുത്തി.
സംഭവത്തെക്കുറിച്ച് ചിത്രത്തിന്റെ സംവിധായകൻ വിജയോട് ചോദിച്ചപ്പോഴാണ് രേഖയുടെ ഇടപെടലിനെക്കുറിച്ച് അറിഞ്ഞതെന്ന് അരുണ പറഞ്ഞു. “നിങ്ങളെ സിനിമയിൽ വേണ്ടെന്ന് രേഖ ആവശ്യപ്പെട്ടു” എന്നായിരുന്നു സംവിധായകന്റെ മറുപടി. ഇത് വിശ്വസിക്കാതെ താൻ നേരിട്ട് രേഖയെ സമീപിച്ചു. അരുണ ഇറാനി ആ വേഷം ചെയ്താൽ തന്റെ കഥാപാത്രം വെറും വില്ലത്തിയായി മാറാൻ സാധ്യതയുണ്ടെന്നും അതുകൊണ്ടാണ് ആ വേഷത്തിൽ നിന്ന് മാറ്റാൻ ആവശ്യപ്പെട്ടതെന്നും രേഖ തുറന്നു സമ്മതിച്ചതായി അരുണ ഇറാനി ഓർത്തെടുത്തു.
തന്റെ അഭിനയമികവ് കാരണം നായികയുടെ വേഷത്തിന് മങ്ങലേൽക്കുമെന്ന് ഭയന്നാണ് രേഖ ഇത്തരമൊരു കാര്യം ചെയ്തതെന്ന് അരുണ ഇറാനി പറഞ്ഞു. ഇമോഷണൽ രംഗങ്ങൾ താൻ ഭംഗിയായി ചെയ്താൽ പ്രേക്ഷകർക്ക് തന്നോട് സഹതാപം തോന്നുമെന്നും അത് രേഖയുടെ കഥാപാത്രത്തിന് തിരിച്ചടിയാകുമെന്നും രേഖ കരുതിയിരുന്നു. അടുത്ത സുഹൃത്തുക്കളായിട്ടും ഇങ്ങനെയൊരു നീക്കം നടത്തിയതിൽ വിഷമം തോന്നിയെങ്കിലും രേഖയോട് ഇപ്പോഴും സൗഹൃദം പുലർത്തുന്നുണ്ടെന്നും താരം കൂട്ടിച്ചേർത്തു.
Summary: Veteran actress Aruna Irani revealed that Rekha requested the makers of the 1981 film Mangalsutra to replace her, fearing Aruna’s performance would overshadow hers.
