അഹമ്മദാബാദ്: ഗുജറാത്തിലെ സൂറത്ത് ജില്ലയിൽ ആശ്രമത്തിന്റെ മറവിൽ പ്രവർത്തിച്ചിരുന്ന വൻ കള്ളനോട്ട് നിർമ്മാണ യൂണിറ്റ് അഹമ്മദാബാദ് സിറ്റി ക്രൈം ബ്രാഞ്ച് തകർത്തു (Gujarat Fake Currency). പരിശോധനയിൽ രണ്ട് കോടി രൂപയുടെ വ്യാജനോട്ടുകൾ പിടിച്ചെടുത്തു. സംഭവവുമായി ബന്ധപ്പെട്ട് ഒരു സ്ത്രീയുൾപ്പെടെ ആറ് പേരെ പോലീസ് അറസ്റ്റ് ചെയ്തു.
സൂറത്തിലെ ധോരൻ പർദി ഗ്രാമത്തിലുള്ള ശ്രീ സത്യ യോഗ ഫൗണ്ടേഷൻ എന്ന ആശ്രമം കേന്ദ്രീകരിച്ചായിരുന്നു കള്ളനോട്ട് മാഫിയയുടെ പ്രവർത്തനം.
500 രൂപയുടെ 40,000 കള്ളനോട്ടുകളാണ് സംഘത്തിൽ നിന്ന് കണ്ടെടുത്തത്. അമരാവതിയിൽ വെച്ച് ഫോർച്യൂണർ കാറിൽ കടത്തുകയായിരുന്ന നോട്ടുകൾ പിടികൂടിയതാണ് അന്വേഷണത്തിൽ വഴിത്തിരിവായത്. കാറിലുണ്ടായിരുന്നവരെ ചോദ്യം ചെയ്തതിനെത്തുടർന്ന് സത്യ യോഗ ഫൗണ്ടേഷൻ ആശ്രമത്തിൽ നടത്തിയ പരിശോധനയിലാണ് അത്യാധുനിക പ്രിന്റിംഗ് യൂണിറ്റ് കണ്ടെത്തിയത്. പ്രിന്റിംഗ് മെഷീൻ, കമ്പ്യൂട്ടറുകൾ, പ്രത്യേകതരം പേപ്പറുകൾ, മഷി എന്നിവയും പോലീസ് പിടിച്ചെടുത്തു.
500 രൂപയുടെ ഒരു യഥാർത്ഥ നോട്ടിന് പകരം 1500 രൂപയുടെ കള്ളനോട്ടുകൾ (മൂന്ന് 500 രൂപ നോട്ടുകൾ) എന്ന നിരക്കിലാണ് സംഘം വിതരണം നടത്തിയിരുന്നത്. രാജ്യത്തെ സാമ്പത്തിക വ്യവസ്ഥയെ അസ്ഥിരപ്പെടുത്താൻ ലക്ഷ്യമിട്ടുള്ള ഈ നീക്കത്തിന് പിന്നിൽ കൂടുതൽ പേരുണ്ടോ എന്നതിനെക്കുറിച്ച് ക്രൈം ബ്രാഞ്ച് വിശദമായ അന്വേഷണം ആരംഭിച്ചിട്ടുണ്ട്.
Story Summary:
Ahmedabad City Crime Branch busted a massive counterfeit currency racket operating under the guise of the Shri Satya Yoga Foundation Ashram in Surat. Authorities seized fake notes worth ₹2 crore, specifically 40,000 notes of ₹500 denomination. Six individuals, including a woman, were arrested after a high-end car was intercepted. A fully equipped printing unit inside the ashram was also uncovered.
