ചെന്നൈ: തമിഴ്നാട് ബിജെപി അധ്യക്ഷൻ നൈനാർ നാഗേന്ദ്രൻ തനിക്കെതിരെ നടത്തിയ അധിക്ഷേപ പരാമർശങ്ങൾക്കെതിരെ കടുത്ത ഭാഷയിൽ പ്രതികരിച്ച് നടി തൃഷ കൃഷ്ണൻ (Actor Trisha Condemns Nainar Nagendran). തമിഴക വെട്രി കഴകം (TVK) അധ്യക്ഷനും നടനുമായ വിജയ്യെ രാഷ്ട്രീയമായി വിമർശിക്കുന്നതിനിടെ തൃഷയുടെ പേര് വലിച്ചിഴച്ചതാണ് വിവാദത്തിന് കാരണമായത്. നൈനാർ നാഗേന്ദ്രന്റെ പ്രസ്താവന “അറപ്പുളവാക്കുന്നതാണെന്നും” തരംതാഴ്ന്നതാണെന്നും തൃഷയുടെ അഭിഭാഷകൻ പുറത്തിറക്കിയ പ്രസ്താവനയിൽ പറയുന്നു.
സംസ്ഥാനത്തെ ഉന്നതമായ രാഷ്ട്രീയ പദവിയിൽ ഇരിക്കുന്ന ഒരാളിൽ നിന്ന് ഇത്തരമൊരു മോശം പരാമർശം പ്രതീക്ഷിച്ചിരുന്നില്ലെന്ന് തൃഷ വ്യക്തമാക്കി. തനിക്ക് ഒരു രാഷ്ട്രീയ പാർട്ടിയുമായും ബന്ധമില്ലെന്നും തന്റെ കരിയറിലൂടെ മാത്രം അറിയപ്പെടാനാണ് താൻ ആഗ്രഹിക്കുന്നതെന്നും താരം കൂട്ടിച്ചേർത്തു. വ്യക്തിജീവിതത്തെ പൊതുമധ്യത്തിൽ ചർച്ചാവിഷയമാക്കരുതെന്നും ഉത്തരവാദിത്തപ്പെട്ടവർ സംസാരിക്കുമ്പോൾ മാന്യത പാലിക്കണമെന്നും തൃഷ ഓർമ്മിപ്പിച്ചു. താനുമായി ബന്ധമില്ലാത്ത വിഷയങ്ങളിലേക്ക് തന്റെ പേര് വലിച്ചിഴക്കരുതെന്നും താരം ആവശ്യപ്പെട്ടു.
വിവാദത്തിന് പിന്നിൽ
വിജയ്യുടെ രാഷ്ട്രീയ അനുഭവപരിചയത്തെ വിമർശിക്കവെയായിരുന്നു നൈനാർ നാഗേന്ദ്രന്റെ വിവാദ പരാമർശം. “വിജയ് ആദ്യം തൃഷയുടെ വീട്ടിൽ നിന്നും പുറത്തുവരട്ടെ, അപ്പോഴേ തമിഴ്നാട്ടിലെ യഥാർത്ഥ സാഹചര്യം അദ്ദേഹത്തിന് മനസ്സിലാവുകയുള്ളൂ” എന്നായിരുന്നു ബിജെപി അധ്യക്ഷൻ പറഞ്ഞത്. 2026 നിയമസഭാ തിരഞ്ഞെടുപ്പിൽ വിജയ് മത്സരിക്കുമെന്ന് പ്രഖ്യാപിച്ചതിന് പിന്നാലെയാണ് ബിജെപി നേതാവ് ഇത്തരമൊരു വ്യക്തിപരമായ അധിക്ഷേപം നടത്തിയത്. സംഭവത്തിൽ ഡിഎംകെയും കോൺഗ്രസും ഉൾപ്പെടെയുള്ള കക്ഷികൾ ബിജെപിക്കെതിരെ രംഗത്തെത്തിയിട്ടുണ്ട്.
Summary: Actor Trisha Krishnan has strongly condemned Tamil Nadu BJP chief Nainar Nagendran for making “distasteful” and derogatory remarks linking her to actor-politician Vijay.
