മഥുര: ഉത്തർപ്രദേശിലെ മഥുര ജില്ലയിലുള്ള ഖപ്പാർപൂർ ഗ്രാമത്തിൽ ഒരു കുടുംബത്തിലെ അഞ്ച് അംഗങ്ങളെ വീടിനുള്ളിൽ മരിച്ച നിലയിൽ കണ്ടെത്തി. കർഷകനായ മനീഷ് കുമാർ (35), ഭാര്യ, ഇവരുടെ മൂന്ന് മക്കൾ എന്നിവരാണ് മരിച്ചത്. സംഭവത്തിൽ പോലീസ് അന്വേഷണം ആരംഭിച്ചു.(5 members of a family found dead in Mathura)
പോലീസ് നൽകുന്ന വിവരമനുസരിച്ച്, ഓരോരുത്തരും വ്യത്യസ്തമായ രീതിയിലാണ് മരിച്ചിരിക്കുന്നത്. മനീഷ് കുമാറിൻ്റെ മൃതദേഹം വൈദ്യുതാഘാതം ഏറ്റ നിലയിലായിരുന്നു. ഭാര്യയെ തൂങ്ങിമരിച്ച നിലയിലാണ് കണ്ടെത്തിയത്. മക്കളായ ഹണി, പ്രിയൻഷി, പ്രതീക് എന്നീ മൂന്ന് കുട്ടികളെ കഴുത്ത് ഞെരിച്ച് കൊലപ്പെടുത്തിയ നിലയിലായിരുന്നു.
ഇതൊരു കൂട്ട ആത്മഹത്യയാകാനാണ് സാധ്യതയെന്ന് പോലീസ് മാധ്യമങ്ങളോട് പ്രതികരിച്ചു. സംഭവസ്ഥലത്തുനിന്നും പോലീസ് ഒരു ആത്മഹത്യാക്കുറിപ്പ് കണ്ടെടുത്തിട്ടുണ്ട്. താനും ഭാര്യയും സ്വമേധയാ ജീവിതം അവസാനിപ്പിക്കുകയാണെന്നും മരണത്തിന് ആരും ഉത്തരവാദികളല്ലെന്നും കത്തിൽ പറയുന്നു. തനിക്ക് കടബാധ്യതകളൊന്നുമില്ലെന്നും, ആരെങ്കിലും കടം അവകാശപ്പെട്ട് വന്നാൽ പണം നൽകരുതെന്നും കുറിപ്പിലുണ്ട്. സംഭവവുമായി ബന്ധപ്പെട്ട് ആരെയും പീഡിപ്പിക്കരുത് എന്ന അഭ്യർത്ഥനയും കത്തിൽ പരാമർശിക്കുന്നു.
