തിരുവനന്തപുരം: യൂബർ കമ്പനിയുടെ കമ്മീഷൻ വർദ്ധനവിനും തൊഴിലാളി വിരുദ്ധ നിലപാടുകൾക്കുമെതിരെ സംസ്ഥാനത്തെ ഓൺലൈൻ ടാക്സി ഡ്രൈവർമാർ നാളെ (ചൊവ്വാഴ്ച) മുതൽ അനിശ്ചിതകാല ബഹിഷ്കരണ സമരം ആരംഭിക്കുന്നു (Uber Strike Kerala 2026). കേരള സ്റ്റേറ്റ് ഓൺലൈൻ ടാക്സി ഡ്രൈവേഴ്സ് യൂണിയന്റെ (KSOTDU) നേതൃത്വത്തിലാണ് പ്രതിഷേധം.
നിലവിൽ കമ്പനി ഈടാക്കുന്ന 25 മുതൽ 30 ശതമാനം വരെയുള്ള ഉയർന്ന കമ്മീഷൻ നിരക്ക് പിൻവലിക്കണം.ഇന്ധനവിലയും വാഹന പരിപാലന ചിലവും വർദ്ധിച്ച സാഹചര്യത്തിൽ സർക്കാർ നിശ്ചയിച്ച മിനിമം കൂലി ഡ്രൈവർമാർക്ക് ഉറപ്പാക്കണം. ഡ്രൈവർമാരുടെ വരുമാനം ഗണ്യമായി കുറയുന്ന സാഹചര്യം ഒഴിവാക്കാൻ കമ്പനി തയ്യാറാകണം, തുടങ്ങിയവയാണ് ആവശ്യങ്ങൾ.
നാളെ പുലർച്ചെ മുതൽ തിരുവനന്തപുരം, കൊച്ചി, കോഴിക്കോട് തുടങ്ങിയ നഗരങ്ങളിൽ ഡ്രൈവർമാർ യൂബർ ആപ്പുകൾ ഓഫ് ചെയ്ത് പ്രതിഷേധിക്കും. ഇതോടെ ഈ നഗരങ്ങളിൽ ഓൺലൈൻ ടാക്സി സേവനം ലഭ്യമാകാൻ പ്രയാസമുണ്ടാകും. പ്രശ്നത്തിൽ സർക്കാർ അടിയന്തരമായി ഇടപെട്ടില്ലെങ്കിൽ സമരം കൂടുതൽ ശക്തമാക്കാനാണ് യൂണിയന്റെ തീരുമാനം.
