തിരുവനന്തപുരം: മെഡിക്കൽ കോളേജ് ആശുപത്രിയിൽ ഡോക്ടറാണെന്ന് വ്യാജേന എത്തിയ യുവതിയെ പോലീസ് അറസ്റ്റ് ചെയ്തു (Fake Doctor Arrested Trivandrum). വെള്ളിയാഴ്ച രാവിലെ സൂപ്പർ സ്പെഷ്യാലിറ്റി ബ്ലോക്കിൽ താൻ സീനിയർ റസിഡന്റ് ന്യൂറോ സർജനാണെന്ന് പരിചയപ്പെടുത്തിയാണ് ഇവർ എത്തിയത്. പെരുന്ന സ്വദേശിയും നിലവിൽ പേരൂർക്കടയിൽ താമസക്കാരിയുമായ ഇവ എന്ന യുവതിയാണ് പിടിയിലായത്.
യുവതിയുടെ പെരുമാറ്റത്തിൽ അസ്വാഭാവികത തോന്നിയ സെക്യൂരിറ്റി ജീവനക്കാർ ഉടൻ തന്നെ അധികൃതരെ വിവരം അറിയിച്ചു. താൻ നിരീക്ഷണത്തിലാണെന്ന് മനസ്സിലാക്കിയ യുവതി വേഷം മാറി മൾട്ടി സ്പെഷ്യാലിറ്റി ബ്ലോക്കിലൂടെ പുറത്തുകടക്കാൻ ശ്രമിച്ചു. സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ പരിശോധനയിൽ യുവതി ഓട്ടോയിൽ കയറി രക്ഷപ്പെടാൻ ശ്രമിക്കുന്നതിനിടെ സെക്യൂരിറ്റി ജീവനക്കാർ തടയുകയായിരുന്നു.
തുടർന്ന് മെഡിക്കൽ കോളേജ് പോലീസ് സ്ഥലത്തെത്തി യുവതിയെ കസ്റ്റഡിയിലെടുത്തു. ഇവർ എന്തിനാണ് ഡോക്ടർ ചമഞ്ഞെത്തിയതെന്നോ മുമ്പ് സമാനമായ രീതിയിൽ തട്ടിപ്പ് നടത്തിയിട്ടുണ്ടോ എന്നോ ഉള്ള കാര്യങ്ങൾ പോലീസ് അന്വേഷിച്ചുവരികയാണ്. ആശുപത്രിയിലെ സുരക്ഷാ സംവിധാനങ്ങൾ കൂടുതൽ കർക്കശമാക്കുമെന്ന് അധികൃതർ അറിയിച്ചു.
