കണ്ണൂർ: നിയമസഭാ തിരഞ്ഞെടുപ്പിനുള്ള സിപിഎം സ്ഥാനാർത്ഥി പട്ടിക പുറത്തുവന്നതിന് പിന്നാലെ കണ്ണൂർ സിപിഎമ്മിൽ വൻ പൊട്ടിത്തെറി (T K Govindan CPIM quit). തളിപ്പറമ്പ് മണ്ഡലത്തിൽ പി.കെ. ശ്യാമളയെ സ്ഥാനാർത്ഥിയായി പ്രഖ്യാപിച്ചതിൽ പ്രതിഷേധിച്ച് മുതിർന്ന നേതാവും ജില്ലാ സെക്രട്ടേറിയറ്റ് അംഗവുമായ ടി.കെ. ഗോവിന്ദൻ പാർട്ടി വിട്ടു. ആറ് പതിറ്റാണ്ടോളം നീണ്ട പാർട്ടി ബന്ധം ഉപേക്ഷിച്ച അദ്ദേഹം തളിപ്പറമ്പിൽ സ്വതന്ത്ര സ്ഥാനാർത്ഥിയായി മത്സരിക്കുമെന്നും പ്രഖ്യാപിച്ചു.
സിപിഎമ്മിൽ ഇപ്പോൾ നടക്കുന്നത് കേട്ടുകേൾവിയില്ലാത്ത പ്രവണതകളാണെന്ന് വാർത്താ സമ്മേളനത്തിൽ ടി.കെ. ഗോവിന്ദൻ ആരോപിച്ചു. എം.വി. ഗോവിന്ദൻ മൂന്ന് ടേം പൂർത്തിയാക്കിയ മണ്ഡലത്തിൽ നാലാം തവണ ഭാര്യയെ തന്നെ സ്ഥാനാർത്ഥിയാക്കുന്നത് ആസൂത്രിതമാണെന്നും അദ്ദേഹം കുറ്റപ്പെടുത്തി.
ടി.കെ. ഗോവിന്ദന്റെ പ്രധാന ആരോപണങ്ങൾ:
പാർട്ടിനുള്ളിൽ വലിയ അനീതിയാണ് നടക്കുന്നത്. പിണറായി വിജയനെപ്പോലൊരു നേതാവ് ഇതിന് എങ്ങനെ കൂട്ടുനിൽക്കുന്നു എന്ന് മനസ്സിലാകുന്നില്ല. മണ്ഡലം ഒരു കുടുംബത്തിന് മാത്രമായി മാറ്റിവെക്കുന്നത് അംഗീകരിക്കാനാവില്ല. തളിപ്പറമ്പിൽ ജനവിധി തേടും. യുഡിഎഫ് പിന്തുണ നൽകിയാൽ അത് സ്വീകരിക്കാൻ തയ്യാറാണ്-ടി.കെ. ഗോവിന്ദൻ പറഞ്ഞു.
തളിപ്പറമ്പിൽ എം.വി. ഗോവിന്ദന് പകരം പി.കെ. ശ്യാമള എത്തുന്നതിനെതിരെ പാർട്ടി പ്രാദേശിക തലത്തിൽ നേരത്തെ തന്നെ ചില ഭിന്നസ്വരങ്ങൾ ഉയർന്നിരുന്നു. എന്നാൽ ഒരു മുതിർന്ന നേതാവ് തന്നെ പരസ്യമായി രംഗത്തെത്തി സ്വതന്ത്രനായി മത്സരിക്കാൻ തീരുമാനിച്ചത് സിപിഎമ്മിന് വലിയ തലവേദനയാകും. മാതൃകാ പെരുമാറ്റച്ചട്ടം നിലവിൽ വരികയും നാമനിർദ്ദേശ പത്രികാ സമർപ്പണം ആരംഭിക്കുകയും ചെയ്ത സാഹചര്യത്തിൽ ഈ നീക്കം മണ്ഡലത്തിലെ തിരഞ്ഞെടുപ്പ് ഫലത്തെ കാര്യമായി സ്വാധീനിച്ചേക്കാം.
Story Summary:
Senior CPIM leader and Kannur District Secretariat member T.K. Govindan has quit the party following the announcement of P.K. Shyamala as the candidate for the Taliparamba constituency. Protesting against what he calls “nepotism” (fielding MV Govindan’s wife in his home turf), T.K. Govindan announced that he will contest as an independent candidate. He expressed disappointment in the leadership and stated he is open to UDF support, marking a major internal crisis for the CPIM in its stronghold.
