ന്യൂഡൽഹി: വയനാട് ജില്ലയെയും കോഴിക്കോടിനെയും ബന്ധിപ്പിക്കുന്ന നിർദ്ദിഷ്ട ആനക്കാംപൊയിൽ-കള്ളാടി-മേപ്പാടി തുരങ്കപാതയ്ക്ക് കേന്ദ്ര സർക്കാർ നൽകിയ പരിസ്ഥിതി അനുമതി റദ്ദാക്കണമെന്ന് ആവശ്യപ്പെട്ട് സുപ്രീം കോടതിയിൽ ഹർജി (Wayanad tunnel road). പദ്ധതിയുടെ നിർമ്മാണ പ്രവർത്തനങ്ങൾ അടിയന്തരമായി സ്റ്റേ ചെയ്യണമെന്ന് ആവശ്യപ്പെട്ട് വയനാട് പ്രകൃതി സംരക്ഷണ സമിതിയാണ് കോടതിയെ സമീപിച്ചത്.
2018, 2019 വർഷങ്ങളിലെ പ്രളയത്തിലും അടുത്തിടെ 2024-ൽ മുണ്ടക്കൈ, ചൂരൽമല എന്നിവിടങ്ങളിലുണ്ടായ വൻ ഉരുൾപൊട്ടലിലും തകർന്ന മേഖലയ്ക്ക് സമീപത്തുകൂടിയാണ് തുരങ്കപാത കടന്നുപോകുന്നതെന്നാണ് ഹർജിയിലെ പ്രധാന ആരോപണം. ഈ സാഹചര്യത്തിൽ നിർമ്മാണം പ്രകൃതിക്ഷോഭങ്ങൾക്ക് ആക്കം കൂട്ടുമെന്നാണ് സമിതിയുടെ വാദം.
വേണ്ടത്ര പാരിസ്ഥിതിക പഠനങ്ങൾ നടത്താതെയും കൃത്യമായ നടപടിക്രമങ്ങൾ പാലിക്കാതെയും ആണ് കേന്ദ്രം അനുമതി നൽകിയിട്ടുള്ളതെന്ന് ഹർജിയിൽ പറയുന്നു. നേരത്തെ ഇതേ ആവശ്യമുന്നയിച്ച് ഹൈക്കോടതിയിൽ നൽകിയ ഹർജി തള്ളിയതിനെത്തുടർന്നാണ് സമിതി ഇപ്പോൾ സുപ്രീം കോടതിയിൽ അപ്പീൽ നൽകിയിരിക്കുന്നത്.
മുഖ്യമന്ത്രി പിണറായി വിജയൻ കഴിഞ്ഞ ദിവസമാണ് തുരങ്കപാതയുടെ ആദ്യ സ്ഫോടനത്തിന്റെ (First Blast) ഉദ്ഘാടനം നിർവഹിച്ചത്. കിഫ്ബി (KIIFB) ഫണ്ട് ഉപയോഗിച്ച് നിർമ്മിക്കുന്ന ഈ പാതയ്ക്ക് ഏകദേശം 8.73 കിലോമീറ്റർ നീളമാണുള്ളത്. താമരശ്ശേരി ചുരത്തിലെ ഗതാഗതക്കുരുക്കിന് ശാശ്വത പരിഹാരമായി സർക്കാർ കാണുന്ന പദ്ധതിയാണിത്.
Story Summary:
Wayanad Prakruthi Samrakshana Samithi has moved the Supreme Court seeking to cancel the environmental clearance granted to the Anakkampoyil-Kalladi-Meppadi tunnel road project. The petition demands an immediate stay on construction, citing the high risk of landslides in the region, which recently witnessed devastating landslides in Mundakkai and Chooralmala.
