പാലക്കാട്: ദളിത് യുവതിയെ പീഡിപ്പിച്ചെന്ന കേസിൽ പ്രതിയായ പാലക്കാട് നഗരസഭയിലെ മുൻ കോൺഗ്രസ് കൗൺസിലർ പ്രശോഭ് വത്സന്റെ മുൻകൂർ ജാമ്യാപേക്ഷ പരിഗണിക്കുന്നത് മണ്ണാർക്കാട് എസ്സി/എസ്ടി കോടതി തിങ്കളാഴ്ചത്തേക്ക് മാറ്റി (Prashobh Valsan Rape Case). കേസിൽ പ്രതിയായതിനെ തുടർന്ന് കോൺഗ്രസ് പാർട്ടിയിൽ നിന്ന് പുറത്താക്കപ്പെട്ട പ്രശോഭ് നിലവിൽ ഒളിവിലാണ്.
തന്നെ കുടുക്കാൻ വേണ്ടി കെട്ടിച്ചമച്ച കള്ളക്കേസാണിതെന്നും താൻ നിരപരാധിയാണെന്നുമാണ് പ്രശോഭ് ജാമ്യാപേക്ഷയിൽ അവകാശപ്പെടുന്നത്. അന്വേഷണവുമായി സഹകരിക്കാൻ തയ്യാറാണെന്നും അദ്ദേഹം കോടതിയെ അറിയിച്ചിട്ടുണ്ട്. യുവതിയുടെ പരാതിയെത്തുടർന്ന് പാലക്കാട് ടൗൺ സൗത്ത് പോലീസാണ് പ്രശോഭിനെതിരെ കേസെടുത്തത്. പീഡനം, എസ്സി/എസ്ടി അതിക്രമ നിരോധന നിയമം എന്നീ ഗുരുതരമായ വകുപ്പുകളാണ് ഇയാൾക്കെതിരെ ചുമത്തിയിരിക്കുന്നത്.അതിജീവിത കഴിഞ്ഞ ദിവസം പോലീസ് സ്റ്റേഷനിലെത്തി നേരിട്ട് മൊഴി നൽകിയിരുന്നു. താൻ നേരിട്ട ക്രൂരതയെക്കുറിച്ച് അവർ മാധ്യമങ്ങളിലൂടെ വെളിപ്പെടുത്തുകയും ചെയ്തിരുന്നു.
ലൈംഗികാതിക്രമ പരാതി ഉയർന്നതിന് പിന്നാലെ കോൺഗ്രസ് പ്രശോഭ് വത്സനെ പാർട്ടിയിൽ നിന്ന് പുറത്താക്കിയിരുന്നു. ആദ്യം പ്രാഥമിക അംഗത്വത്തിൽ നിന്ന് സസ്പെൻഡ് ചെയ്തെങ്കിലും പിന്നീട് പുറത്താക്കാൻ തീരുമാനിക്കുകയായിരുന്നു.
പാലക്കാട് നിയമസഭാ ഉപതിരഞ്ഞെടുപ്പ് അടുത്തുനിൽക്കുന്ന സാഹചര്യത്തിൽ കോൺഗ്രസ് നേതാവിനെതിരെയുള്ള പീഡന പരാതി യുഡിഎഫിന് വലിയ തിരിച്ചടിയായിട്ടുണ്ട്. ഇത് തിരഞ്ഞെടുപ്പിൽ പാർട്ടിക്കും മുന്നണിക്കും ദോഷമുണ്ടാക്കുമെന്നാണ് കോൺഗ്രസ് നേതൃത്വത്തിന്റെ വിലയിരുത്തൽ. അതുകൊണ്ട് തന്നെയാണ് അതിവേഗത്തിലുള്ള നടപടി ഇയാൾക്കെതിരെ പാർട്ടി സ്വീകരിച്ചത്.
Story Summary:
The Mannarkkad SC/ST Court has postponed the anticipatory bail plea of former Congress councillor Prashobh Valsan, accused of raping a Dalit woman, to Monday. Prashobh, who was expelled from the Congress following the incident, remains absconding. While the accused claims the case is fabricated, the victim has provided a detailed statement to the Palakkad Town South Police. The case has sparked a political controversy in Palakkad, especially as the assembly by-election approaches.
