തിരുവനന്തപുരം: ഛത്തീസ്ഗഡിലെ കന്യാസ്ത്രീകളെ ആക്രമിച്ചവരോട് ചേർന്നുനിൽക്കുന്നയാളാണ് താനെന്ന രാഹുൽ ഗാന്ധിയുടെ ആക്ഷേപത്തിന് മറുപടിയുമായി മുഖ്യമന്ത്രി പിണറായി വിജയൻ (Pinarayi Vijayan vs Rahul Gandhi). രാഹുലിന്റെ വാക്കുകൾ മിതമായ ഭാഷയിൽ പറഞ്ഞാൽ അജ്ഞതയും അധികപ്രസംഗവുമാണെന്ന് മുഖ്യമന്ത്രി ഫെയ്സ്ബുക്ക് കുറിപ്പിലൂടെ വ്യക്തമാക്കി. കന്യാസ്ത്രീകളെ അന്യായമായി അറസ്റ്റുചെയ്യാൻ ബിജെപി സർക്കാരിന് ആയുധമായ നിയമങ്ങൾ കോൺഗ്രസിന്റെ സംഭാവനയാണെന്നും അദ്ദേഹം ഓർമ്മിപ്പിച്ചു.
ഛത്തീസ്ഗഡിൽ കന്യാസ്ത്രീകളെ അറസ്റ്റ് ചെയ്തത് ‘മതസ്വാതന്ത്ര്യ നിയമത്തിലെ’ നാലാം വകുപ്പ് പ്രകാരമാണ്. 2000-ൽ ഛത്തീസ്ഗഡ് രൂപീകരിക്കപ്പെട്ടപ്പോൾ അജിത് ജോഗിയുടെ നേതൃത്വത്തിലുള്ള കോൺഗ്രസ് സർക്കാരാണ് ഈ നിയമം അവിടെ നിലനിർത്തിയത്. ന്യൂനപക്ഷങ്ങൾക്കെതിരെ ദുരുപയോഗം ചെയ്യപ്പെടുന്ന ഈ നിയമം റദ്ദാക്കാൻ വർഷങ്ങളോളം ഭരണത്തിലിരുന്നിട്ടും കോൺഗ്രസ് തയ്യാറായില്ലെന്ന് മുഖ്യമന്ത്രി കുറ്റപ്പെടുത്തി.
ഭരണഘടനാ വിരുദ്ധമായ ഇത്തരം നിയമങ്ങൾ റദ്ദാക്കണമെന്നതാണ് ഇടതുപക്ഷത്തിന്റെ സുവ്യക്തമായ നിലപാട്. കന്യാസ്ത്രീകൾ അറസ്റ്റ് ചെയ്യപ്പെട്ടപ്പോൾ സിപിഐഎം അഖിലേന്ത്യാ നേതാക്കൾ അവിടെ നേരിട്ട് ഇടപെട്ടിരുന്നു.കേരളത്തിലെ കോൺഗ്രസ് നേതാക്കൾ കന്യാസ്ത്രീകളുടെ അറസ്റ്റിൽ രംഗത്തുവന്നപ്പോൾ ഛത്തീസ്ഗഡിലെ കോൺഗ്രസ് നേതൃത്വം വിട്ടുനിന്നത് ആത്മാർത്ഥതയില്ലാത്ത നടപടിയാണെന്ന് മുഖ്യമന്ത്രി പറഞ്ഞു. കോൺഗ്രസ് ഭരണത്തിലുള്ള ഹിമാചൽ പ്രദേശിലെങ്കിലും ഈ നിയമം റദ്ദാക്കാൻ രാഹുൽ ഗാന്ധി തയ്യാറുണ്ടോ എന്നും അദ്ദേഹം ചോദിച്ചു.
“കോൺഗ്രസിന്റെ സ്വഭാവം വെച്ച് സിപിഐഎമ്മിനെ അളന്നു നോക്കാനും മാർക്കിടാനും രാഹുൽ വരേണ്ടതില്ല” എന്ന് പറഞ്ഞാണ് മുഖ്യമന്ത്രി തന്റെ കുറിപ്പ് അവസാനിപ്പിക്കുന്നത്. തിരഞ്ഞെടുപ്പ് പ്രചാരണത്തിനിടെ രാഹുൽ ഗാന്ധിയും പിണറായി വിജയനും തമ്മിലുള്ള വാക്പോര് ഇതോടെ പുതിയ തലത്തിലേക്ക് എത്തിയിരിക്കുകയാണ്.
Story Summary:
Chief Minister Pinarayi Vijayan hit back at Rahul Gandhi’s allegation that he is aligned with those who attacked nuns in Chhattisgarh. Calling Rahul’s remarks “ignorance and arrogance,” the CM pointed out that the very law used to arrest nuns was retained and upheld by Congress governments in Chhattisgarh for years. He challenged the Congress to repeal similar laws in Himachal Pradesh and asserted that CPI(M) leaders were the ones who actually intervened on the ground while the local Congress stayed silent.
