പന്തളം: കുരമ്പാലയിൽ പരക്കെ ആക്രമണം നടത്തിയ തെരുവുനായയ്ക്ക് പേവിഷബാധ സ്ഥിരീകരിച്ചു (Stray Dog Attack Pandalam). വെള്ളിയാഴ്ച രാവിലെ എട്ട് മണിയോടെയായിരുന്നു കുരമ്പാല പ്രദേശം നടുങ്ങിയ സംഭവം. യാതൊരു പ്രകോപനവുമില്ലാതെ എട്ടുപേരെയാണ് നായ കടിച്ചു പരിക്കേൽപ്പിച്ചത്.
പ്രദേശം ഭീതിയിലാഴ്ത്തി വീണ്ടും ആളുകളെ ആക്രമിക്കാൻ പാഞ്ഞടുത്ത നായയെ നാട്ടുകാർ തല്ലിക്കൊല്ലുകയായിരുന്നു. തുടർന്ന് നായയുടെ സാമ്പിളുകൾ ശേഖരിച്ച് ശാസ്ത്രീയ പരിശോധനയ്ക്ക് അയച്ചു. പരിശോധനാ ഫലം പുറത്തുവന്നതോടെ നായയ്ക്ക് പേവിഷബാധയുണ്ടായിരുന്നു എന്ന് സ്ഥിരീകരിച്ചു. ഇതോടെ പ്രദേശം അതീവ ജാഗ്രതയിലാണ്.
കടിയേറ്റ എട്ടുപേർക്കും അടിയന്തരമായി പ്രതിരോധ വാക്സിൻ നൽകിയിട്ടുണ്ട്. ഇവരെല്ലാവരും നിരീക്ഷണത്തിലാണ്.
കുരമ്പാല പ്രദേശത്ത് തെരുവുനായ ശല്യം രൂക്ഷമാണെന്നും മനുഷ്യജീവന് ഭീഷണിയാകുന്ന രീതിയിൽ നായകൾ വിഹരിക്കുകയാണെന്നും നാട്ടുകാർ പരാതിപ്പെടുന്നു. സംഭവത്തെത്തുടർന്ന് മേഖലയിലെ മറ്റ് നായകൾക്കും പേവിഷബാധയുണ്ടോ എന്ന് ആരോഗ്യവകുപ്പും മൃഗസംരക്ഷണ വകുപ്പും പരിശോധിക്കുന്നുണ്ട്.
