Follow on Google News
തിരുവനന്തപുരം: കേരളത്തിൽ പിണറായി വിജയന്റെ നേതൃത്വത്തിലുള്ള സർക്കാർ മൂന്നാം തവണയും അധികാരത്തിലെത്തുമെന്ന് സിപിഐഎം സംസ്ഥാന സെക്രട്ടറി എം.വി. ഗോവിന്ദൻ (MV Govindan Press Meet Election Analysis). നിയമസഭാ തിരഞ്ഞെടുപ്പ് അവലോകനം ചെയ്യാൻ ചേർന്ന സംസ്ഥാന സെക്രട്ടറിയേറ്റ് യോഗത്തിന് ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. 90-ൽ അധികം സീറ്റുകൾ നേടി എൽഡിഎഫ് മികച്ച വിജയം ഉറപ്പാക്കുമെന്നും അദ്ദേഹം അവകാശപ്പെട്ടു.
സർക്കാർ പ്രവർത്തനങ്ങളിൽ ജനങ്ങൾ സംതൃപ്തരാണ്. ജനങ്ങൾ ആഗ്രഹിക്കുന്നത് ഭരണത്തുടർച്ചയാണെന്നും പിണറായി വിജയൻ തന്നെ മുഖ്യമന്ത്രിയായി തുടരുമെന്നും അദ്ദേഹം പറഞ്ഞു.യുഡിഎഫ് ജയിക്കുമെന്നത് വാസ്തവവിരുദ്ധമായ പ്രചാരണമാണ്. അവർ ഇപ്പോൾ തന്നെ സാങ്കൽപ്പിക മുഖ്യമന്ത്രിയെ നിയോഗിച്ചു കഴിഞ്ഞു. പ്രതിപക്ഷ നേതാവ് വി.ഡി. സതീശൻ തിരഞ്ഞെടുപ്പിന് ശേഷം വനവാസത്തിന് പോകാതെ പ്രതിപക്ഷത്ത് തന്നെ തുടരണമെന്നും അദ്ദേഹം പരിഹസിച്ചു.
ഇത്തവണത്തെ തിരഞ്ഞെടുപ്പിൽ ബിജെപിക്ക് ഒരു സീറ്റ് പോലും ലഭിക്കില്ലെന്ന് എം.വി. ഗോവിന്ദൻ ഉറപ്പിച്ചു പറഞ്ഞു.ന്യൂനപക്ഷ വോട്ടുകൾ യുഡിഎഫിന് അനുകൂലമായെന്ന് പറയാനാകില്ല. വോട്ടർ പട്ടിക പുതുക്കലിന് (SIR) ശേഷം വോട്ട് ചെയ്യണമെന്ന വാശി ന്യൂനപക്ഷങ്ങൾക്കിടയിൽ ഉണ്ടായിട്ടുണ്ട്. എന്നാൽ ഇത് ഏകപക്ഷീയമായ ഏകീകരണമാണെന്ന് കരുതുന്നില്ല.
യുഡിഎഫും ബിജെപിയും വോട്ടർമാരെ സ്വാധീനിക്കാൻ പണം, കിറ്റ്, സാരി എന്നിവ വ്യാപകമായി വിതരണം ചെയ്തതായി അദ്ദേഹം ആരോപിച്ചു. ഉത്തരേന്ത്യൻ മോഡലിലുള്ള രാഷ്ട്രീയ വൈകൃതങ്ങളാണ് കേരളത്തിൽ ഇത്തവണ കണ്ടത്. പണത്തിന്റെ സ്വാധീനത്തെ ജനകീയ അടിത്തറ ഉപയോഗിച്ചാണ് ഇടതുപക്ഷം പ്രതിരോധിച്ചതെന്നും അദ്ദേഹം വ്യക്തമാക്കി.
പോളിങ് വർധിച്ചത് ഭരണവിരുദ്ധ തരംഗം കൊണ്ടല്ലെന്നും, രാഷ്ട്രീയമായ അവബോധത്തോടെ ജനങ്ങൾ വോട്ട് ചെയ്തതാണെന്നും എം.വി. ഗോവിന്ദൻ കൂട്ടിച്ചേർത്തു.
Story Summary:
CPIM State Secretary M.V. Govindan expressed confidence that the LDF will secure a third term with over 90 seats. Speaking after the CPIM State Secretariat meeting, he dismissed UDF’s victory claims as baseless and predicted that BJP would win zero seats. Govindan alleged that UDF and BJP used unethical methods like distributing cash, kits, and sarees to lure voters, similar to North Indian political tactics. He maintained that the increased polling percentage was not a result of anti-incumbency but rather a reflection of people’s desire for the Pinarayi Vijayan government to continue.
