തിരുവനന്തപുരം: വരാനിരിക്കുന്ന നിയമസഭാ തെരഞ്ഞെടുപ്പിൽ ബിജെപി സംസ്ഥാനത്ത് ഒരൊറ്റ സീറ്റ് പോലും പിടിക്കില്ലെന്നും എൽഡിഎഫ് മികച്ച ഭൂരിപക്ഷത്തോടെ അധികാരം നിലനിർത്തുമെന്നും സി.പി.എം സംസ്ഥാന സെക്രട്ടറി എം.വി. ഗോവിന്ദൻ (M.V. Govindan Press Conference). കഴിഞ്ഞ പത്ത് വർഷത്തെ വികസന നേട്ടങ്ങൾ മുൻനിർത്തിയാണ് ഇടതുപക്ഷം ജനങ്ങളെ സമീപിക്കുന്നതെന്ന് അദ്ദേഹം തിരുവനന്തപുരത്ത് നടന്ന വാർത്താസമ്മേളനത്തിൽ പറഞ്ഞു.
വയനാട് ചൂരൽമല ദുരന്തവുമായി ബന്ധപ്പെട്ട് കോൺഗ്രസ് വലിയ സാമ്പത്തിക തട്ടിപ്പാണ് നടത്തിയതെന്ന് എം.വി. ഗോവിന്ദൻ ആരോപിച്ചു. വീടുപണി പൂർത്തിയാക്കിയ ശേഷം കണക്ക് പറയുമെന്ന് പറഞ്ഞ പ്രതിപക്ഷ നേതാവിന്റെ വാക്കുകൾ പൊള്ളയാണെന്ന് അദ്ദേഹം പറഞ്ഞു.
“100 കോടിയിലധികം രൂപ കോൺഗ്രസ് പിരിച്ചെന്നാണ് അറിയുന്നത്. ഈ പണം എവിടെ പോയി? ഒരു രൂപ പോലും കൈവശമില്ലാതെ എങ്ങനെയാണ് കോൺഗ്രസ് 230 വീടുകൾ നൽകുക?” എന്നും അദ്ദേഹം ചോദിച്ചു. പുനരധിവാസത്തിനായി കോൺഗ്രസ് പ്രഖ്യാപിച്ച പദ്ധതികൾ വെറും വാഗ്ദാനങ്ങൾ മാത്രമാണെന്ന് അദ്ദേഹം കുറ്റപ്പെടുത്തി.
സിപിഎം നേതൃത്വം വാർത്താസമ്മേളനങ്ങൾ നടത്തുന്നതിൽ വിമുഖത കാണിക്കുന്നു എന്ന ആരോപണങ്ങളെ അദ്ദേഹം തള്ളി. സ്ഥാനാർത്ഥികളും നേതാക്കളും ജനങ്ങളിലേക്ക് ഇറങ്ങിച്ചെന്ന് എല്ലാവരുടെയും വോട്ട് അഭ്യർത്ഥിക്കുമെന്നും അദ്ദേഹം വ്യക്തമാക്കി.
തിരഞ്ഞെടുപ്പ് പ്രചാരണം ശക്തമാകുന്നതിനിടെ പ്രതിപക്ഷത്തിനെതിരെ കടുത്ത രാഷ്ട്രീയ ആരോപണങ്ങൾ ഉന്നയിച്ചുകൊണ്ടാണ് എം.വി. ഗോവിന്ദൻ രംഗത്തെത്തിയത്. വരും ദിവസങ്ങളിൽ വയനാട് പുനരധിവാസ ഫണ്ട് സംബന്ധിച്ച ചർച്ചകൾ രാഷ്ട്രീയ കേരളത്തിൽ കൂടുതൽ സജീവമാകുമെന്ന് ഇതോടെ ഉറപ്പായി.
Story Summary:
CPM State Secretary M.V. Govindan stated that the LDF will return to power with a significant majority and the BJP will fail to win even a single seat in the upcoming elections. He accused the Congress party of a major financial scam regarding the Wayanad Chooralmala disaster relief fund, questioning the whereabouts of over ₹100 crore allegedly collected by the party. Govindan challenged the Opposition Leader’s claims about housing projects for victims, asserting that the LDF is contesting based on 10 years of developmental achievements.
