ന്യൂഡൽഹി: സൂപ്പർമാർക്കറ്റുകളിൽ നിന്നും കടകളിൽ നിന്നും വാങ്ങുന്ന പഴങ്ങളിലും പച്ചക്കറികളിലും പതിപ്പിച്ചിരിക്കുന്ന സ്റ്റിക്കറുകൾ ഗുരുതരമായ ആരോഗ്യപ്രശ്നങ്ങൾക്ക് കാരണമായേക്കാമെന്ന് കേന്ദ്ര ഭക്ഷ്യ സുരക്ഷാ ഗുണനിലവാര അതോറിറ്റി (FSSAI). ആകർഷകമായ ഈ സ്റ്റിക്കറുകൾക്ക് പിന്നിൽ ഒളിഞ്ഞിരിക്കുന്ന രാസവസ്തുക്കളെക്കുറിച്ച് ഉപഭോക്താക്കൾ ജാഗ്രത പാലിക്കണമെന്ന് അതോറിറ്റി നിർദ്ദേശിച്ചു (FSSAI Warning Fruit Stickers).
എന്താണ് അപകടം?
ഈ സ്റ്റിക്കറുകൾ പഴങ്ങളിൽ ഒട്ടിക്കാൻ ഉപയോഗിക്കുന്ന സിന്തറ്റിക് പശയും അതിലെ വിവരങ്ങൾ രേഖപ്പെടുത്താൻ ഉപയോഗിക്കുന്ന മഷിയും വിഷാംശമുള്ളതാണ്. ഇവ പഴത്തിന്റെ തൊലിയിലൂടെ ഉള്ളിലേക്ക് കടക്കാൻ സാധ്യതയുണ്ട്. അബദ്ധത്തിൽ ഇവ ഉള്ളിലെത്തിയാൽ തൊണ്ടയിലും വയറിലും അസ്വസ്ഥത, ദഹനക്കേട്, ശ്വാസംമുട്ടൽ, ഛർദ്ദി എന്നിവ ഉണ്ടാകാൻ സാധ്യത കൂടുതലാണ്.
ഉപഭോക്താക്കൾ ശ്രദ്ധിക്കേണ്ട കാര്യങ്ങൾ:
പഴങ്ങൾ കഴിക്കുന്നതിന് മുൻപ് സ്റ്റിക്കറുകൾ പൂർണ്ണമായും നീക്കം ചെയ്യുകയും ആ ഭാഗത്തെ തൊലി ചെത്തിക്കളയുകയും വേണം.
പഴങ്ങളും പച്ചക്കറികളും നന്നായി കഴുകുക. ആവശ്യമെങ്കിൽ ഇളം ചൂടുവെള്ളത്തിൽ ഒരു തുള്ളി ക്ലോറിൻ (50ppm) ചേർത്ത് മുക്കിവെക്കുന്നത് അണുക്കളെ നശിപ്പിക്കാൻ സഹായിക്കും.
തണുപ്പ് ആവശ്യമുള്ളവ ഫ്രിഡ്ജിലും അല്ലാത്തവ സാധാരണ ഊഷ്മാവിൽ ബാസ്കറ്റുകളിലോ റാക്കുകളിലോ സൂക്ഷിക്കുക.
പഴങ്ങൾ കഴുകിയ സിങ്ക് കൃത്യമായി സാനിറ്റൈസ് ചെയ്ത് അണുവിമുക്തമാക്കണം.
പഴങ്ങൾ പുതുമയുള്ളതാണെന്ന് കാണിക്കാനും ബ്രാൻഡ് രേഖപ്പെടുത്താനുമാണ് വ്യാപാരികൾ ഇത്തരം സ്റ്റിക്കറുകൾ ഉപയോഗിക്കുന്നത്. എന്നാൽ ഇവ ആരോഗ്യത്തിന് ഹാനികരമാണെന്നതിനാൽ ജനങ്ങൾ ജാഗ്രത പുലർത്തണമെന്ന് എഫ്.എസ്.എസ്.എ.ഐ ആവർത്തിച്ചു.
Story Summary:
The FSSAI has issued a warning regarding stickers placed on fruits and vegetables, stating they can cause serious health issues. The synthetic adhesives and toxic inks used in these stickers can seep into the produce, leading to digestive problems, nausea, and respiratory discomfort if consumed. Consumers are advised to remove the stickers and peel the affected skin before thoroughly washing the produce.
