കോട്ടയം: വരാനിരിക്കുന്ന നിയമസഭാ തിരഞ്ഞെടുപ്പിനുള്ള ഒരുക്കങ്ങൾ സിപിഎം ജില്ലയിൽ വേഗത്തിലാക്കി (CPIM Kottayam Candidates 2026). സിറ്റിംഗ് സീറ്റായ ഏറ്റുമാനൂരിൽ മന്ത്രി വി.എൻ. വാസവൻ തന്നെ വീണ്ടും മത്സരിക്കും. കോട്ടയം മണ്ഡലത്തിൽ തിരുവഞ്ചൂർ രാധാകൃഷ്ണനെ നേരിടാൻ കെ. അനിൽകുമാറിനെയാണ് പാർട്ടി നിശ്ചയിച്ചിരിക്കുന്നത്.
മന്ത്രി വി.എൻ. വാസവൻ വീണ്ടും ജനവിധി തേടും. മണ്ഡലത്തിൽ വികസന സന്ദേശ യാത്ര നയിക്കാൻ അദ്ദേഹത്തിന് പാർട്ടി നിർദ്ദേശം നൽകി കഴിഞ്ഞതായാണ് റിപ്പോർട്ട്. തിരുവഞ്ചൂർ രാധാകൃഷ്ണനെതിരെ കരുത്തനായ എതിരാളിയായി കെ. അനിൽകുമാർ എത്തും. മണ്ഡല അടിസ്ഥാനത്തിൽ നടക്കുന്ന പാർട്ടി യാത്ര നയിക്കുന്നത് അനിൽകുമാറാണ്, ഇത് അദ്ദേഹത്തിന്റെ സ്ഥാനാർത്ഥിത്വത്തിന്റെ ഉറച്ച സൂചനയായി കണക്കാക്കപ്പെടുന്നു.
ജെയ്ക് സി. തോമസ്, റെജി സഖറിയ എന്നിവർ പിന്മാറിയ സാഹചര്യത്തിൽ ചാണ്ടി ഉമ്മനെ നേരിടാൻ പുതുപ്പള്ളിയിൽ പുതുമുഖത്തെ ഇറക്കാനാണ് പാർട്ടി നീക്കം. പുതുപ്പള്ളിയിൽ പ്രധാനമായും രണ്ട് പേരുകളാണ് പാർട്ടി പരിഗണിക്കുന്നത്:
സുഭാഷ് പി. വർഗീസ്: പുതുപ്പള്ളി ഏരിയ കമ്മിറ്റി സെക്രട്ടറി. യുവമുഖം എന്ന നിലയിലും മണ്ഡലത്തിലെ സജീവ സാന്നിധ്യമാന്നതിനാലും സുഭാഷിന് മുൻതൂക്കമുണ്ട്.
കെ.എം. രാധാകൃഷ്ണൻ: ജില്ലാ സെക്രട്ടേറിയറ്റ് അംഗം. സീനിയോറിറ്റി പരിഗണിക്കുകയാണെങ്കിൽ രാധാകൃഷ്ണൻ സ്ഥാനാർത്ഥിയായേക്കും.
മുഖ്യമന്ത്രി ധർമ്മടത്ത് നേരിട്ട് വികസന യാത്ര നയിക്കുമ്പോൾ, കോട്ടയത്ത് സ്ഥാനാർത്ഥിത്വം ഉറപ്പിച്ചവർ തന്നെ യാത്ര നയിക്കണമെന്ന കർശന നിർദ്ദേശമാണ് പാർട്ടി നൽകിയിരിക്കുന്നത്. വരും ദിവസങ്ങളിൽ ഔദ്യോഗിക പ്രഖ്യാപനം ഉണ്ടാകും.
