കോട്ടയം: കേരള സ്കൂൾ ടീച്ചേഴ്സ് അസോസിയേഷൻ (KSTA) സംസ്ഥാന സമ്മേളനത്തിന്റെ സമാപന പൊതുസമ്മേളനത്തിൽ പ്രസംഗിക്കുന്നതിനിടെ മുഖ്യമന്ത്രി പിണറായി വിജയൻ കടുത്ത ഭാഷയിൽ രോഷം പ്രകടിപ്പിച്ചു (Pinarayi Vijayan Angry KSTA Conference). മുഖ്യമന്ത്രി പ്രസംഗം ആരംഭിച്ചതിന് തൊട്ടുപിന്നാലെ സദസ്സിന്റെ ഒരു ഭാഗത്ത് നിന്ന് ചെണ്ടമേളം ഉയർന്നതാണ് അദ്ദേഹത്തെ ക്ഷുഭിതനാക്കിയത്.
ചെണ്ടകൊട്ട് നിർത്താത്തതിനെത്തുടർന്ന് പ്രസംഗം പാതിവഴിയിൽ നിർത്തിയ മുഖ്യമന്ത്രി മൈക്കിലൂടെ പരസ്യമായി ഇങ്ങനെ ചോദിച്ചു:
“നിങ്ങളുടെ സമ്മേളനത്തിന്റെ ഭാഗമായുള്ള കൊട്ടാണോ ഇത്? പറയുന്നത് ശ്രദ്ധിക്കാൻ പാടില്ലെന്ന മട്ടിൽ നിങ്ങളുടെ കൂട്ടത്തിലുള്ള ആൾക്കാർ ചെണ്ടയെടുത്ത് കൊട്ടിക്കൊണ്ടിരിക്കുകയാണോ? ഗൗരവമായ കാര്യങ്ങൾ അവതരിപ്പിക്കുമ്പോൾ തടസ്സമുണ്ടാക്കുന്ന രീതിയിൽ പെരുമാറുന്നത് ശരിയല്ല.”
വിദ്യാഭ്യാസ മേഖലയിലെ പുതിയ മാറ്റങ്ങളെക്കുറിച്ചും നാടിന്റെ അവസ്ഥയെക്കുറിച്ചും സംസാരിക്കുമ്പോഴാണ് തടസ്സമുണ്ടായത്. അധ്യാപകരുടെ സംഘടനയായ കെഎസ്ടിഎയുടെ സമ്മേളനത്തിൽ കുറച്ചുകൂടി അച്ചടക്കം പ്രതീക്ഷിക്കുന്നുണ്ടെന്നും ഇത്തരം പെരുമാറ്റങ്ങൾ ഗൗരവമായി കാണണമെന്നും അദ്ദേഹം ഓർമ്മിപ്പിച്ചു.
ഫെബ്രുവരി 14 മുതൽ 16 വരെ കോട്ടയത്താണ് കെഎസ്ടിഎയുടെ 35-ാമത് സംസ്ഥാന സമ്മേളനം നടന്നത്. സമാപന സമ്മേളനം ഉദ്ഘാടനം ചെയ്യാനാണ് മുഖ്യമന്ത്രി എത്തിയത്. മുഖ്യമന്ത്രിയുടെ കടുത്ത പ്രതികരണത്തെത്തുടർന്ന് മിനിറ്റുകൾക്കുള്ളിൽ തന്നെ ചെണ്ടമേളം അവസാനിക്കുകയും സദസ്സ് ശാന്തമാവുകയും ചെയ്തു. ഇതിനുശേഷമാണ് അദ്ദേഹം പ്രസംഗം തുടർന്നത്.
