കൊച്ചി: ചോറ്റാനിക്കരയിൽ ആദിത്യ എന്ന 16 വയസ്സുകാരി മരിച്ച സംഭവത്തിൽ സൈബർ ലോകത്തെ ദുരൂഹതകൾ വർദ്ധിക്കുന്നു (Chottanikkara Girl Suicide). പെൺകുട്ടി പിന്തുടർന്നിരുന്ന ഇൻസ്റ്റഗ്രാം അക്കൗണ്ടുകളിലെ വിവരങ്ങൾ പുറത്തുവന്നതോടെ അന്വേഷണം പുതിയ തലത്തിലേക്ക് നീങ്ങിയിരിക്കുകയാണ്. കൊറിയൻ ബാന്റ് അംഗത്തിന്റെ മരണത്തിലുള്ള മനോവിഷമമാണ് ആത്മഹത്യയ്ക്ക് കാരണമെന്ന് കരുതിയിരുന്നെങ്കിലും, പുതിയ സൈബർ തെളിവുകൾ മറ്റ് സാധ്യതകളിലേക്കും വിരൽ ചൂണ്ടുന്നു.
ആദിത്യ പിന്തുടർന്നിരുന്ന ‘ബ്ലാക്ക് വെനം’ എന്ന അക്കൗണ്ടിൽ കൊറിയൻ ചിത്രങ്ങൾ ഉൾപ്പെടെയുള്ളവ പോസ്റ്റ് ചെയ്തിട്ടുണ്ട്. ഈ അക്കൗണ്ടിന്റെ യഥാർത്ഥ ഉടമയെ കണ്ടെത്താനുള്ള ശ്രമത്തിലാണ് പോലീസ്. സ്കൂളിൽ ഒരു വിദ്യാർത്ഥി കൊണ്ടുവന്നിരുന്ന ഫോണിൽ നിന്ന് എട്ടോളം ഇൻസ്റ്റഗ്രാം അക്കൗണ്ടുകൾ ലോഗിൻ ചെയ്തതായി ഫോറൻസിക് പരിശോധനയിൽ കണ്ടെത്തി. കുട്ടികൾ ഒരേ ഫോൺ ഉപയോഗിച്ച് വിവിധ അക്കൗണ്ടുകൾ പ്രവർത്തിപ്പിച്ചിരുന്നത് ദുരൂഹത വർദ്ധിപ്പിക്കുന്നു.ഈ അക്കൗണ്ടുകളുടെ ലോഗിൻ വിവരങ്ങൾ പോലീസിന് ലഭിച്ചിട്ടുണ്ട്. ഇതിലൂടെ കൈമാറ്റം ചെയ്യപ്പെട്ട സന്ദേശങ്ങളും ചിത്രങ്ങളും പരിശോധിച്ചുവരികയാണ്.
ജനുവരി 27-ന് സ്കൂളിലേക്ക് പോകുകയാണെന്ന് പറഞ്ഞ് ഇറങ്ങിയ ആദിത്യയെ വീടിനടുത്തുള്ള പാറമടയിൽ മരിച്ച നിലയിൽ കണ്ടെത്തുകയായിരുന്നു. മാമല സ്വദേശി മഹേഷിന്റെ ഏക മകളായ ആദിത്യയുടെ മരണത്തിൽ സൈബർ ചതിക്കുഴികൾ ഉണ്ടോ എന്നാണ് പോലീസ് ഇപ്പോൾ പ്രധാനമായും പരിശോധിക്കുന്നത്.
