ഇടുക്കി: അടിമാലിയിൽ ദേശീയപാതയിലുണ്ടായ മണ്ണിടിച്ചിലിനെത്തുടർന്ന് വീട് നഷ്ടപ്പെട്ട കുടുംബങ്ങൾക്ക് കുടിശികയായ വീട്ടുവാടക നൽകാൻ തീരുമാനമായി (Adimali Landslide). മന്ത്രി റോഷി അഗസ്റ്റിന്റെ അധ്യക്ഷതയിൽ ദുരന്തബാധിതരുടെ പ്രതിനിധികളും എഡിഎമ്മും നടത്തിയ ചർച്ചയിലാണ് നിർണ്ണായക തീരുമാനമായത്. ഇതോടെ കരാർ കമ്പനിയുടെ യാർഡിന് മുന്നിൽ ദുരന്തബാധിതർ നടത്തിവന്ന സമരം താൽക്കാലികമായി അവസാനിപ്പിച്ചു.
കഴിഞ്ഞ ഒക്ടോബർ 25-നുണ്ടായ മണ്ണിടിച്ചിലിൽ അടിമാലി ലക്ഷംവീട് കോളനിയിലെ വീടുകൾ തകരുകയും 23 കുടുംബങ്ങളെ മാറ്റിപ്പാർപ്പിക്കുകയും ചെയ്തിരുന്നു. ഇതിൽ 15 കുടുംബങ്ങൾ വാടക വീടുകളിലാണ് താമസിക്കുന്നത്. ഇവർക്ക് കരാർ കമ്പനി വാടക നൽകുമെന്ന് നേരത്തെ ഉറപ്പ് നൽകിയിരുന്നെങ്കിലും മൂന്ന് മാസമായി തുക മുടങ്ങിയതാണ് പ്രതിഷേധത്തിന് കാരണമായത്. കുടിശികയായിരുന്ന 6.28 ലക്ഷം രൂപ കരാർ കമ്പനി ഇപ്പോൾ സമരസമിതിക്ക് കൈമാറിയിട്ടുണ്ട്.
സംഭവത്തെക്കുറിച്ച് രണ്ട് ദിവസത്തിനുള്ളിൽ റിപ്പോർട്ട് സമർപ്പിക്കാൻ ചീഫ് സെക്രട്ടറിയോട് നിർദ്ദേശിച്ചു. റിപ്പോർട്ട് ലഭിച്ച ശേഷം സർക്കാർ തുടർനടപടികൾ സ്വീകരിക്കും. ഇൻഷുറൻസ് തുക വേഗത്തിൽ ലഭ്യമാക്കാൻ കരാർ കമ്പനിക്ക് കർശന നിർദ്ദേശം നൽകിയിട്ടുണ്ട്. നിലവിൽ സർക്കാർ നൽകിയ ഉറപ്പിന്മേലാണ് സമരം പിൻവലിച്ചതെന്നും പുനരധിവാസം ഉൾപ്പെടെയുള്ള നടപടികൾ വൈകിയാൽ സമരം ശക്തമാക്കുമെന്നും ദുരന്തബാധിതർ അറിയിച്ചു.
Summary: Authorities have decided to pay the pending house rent to the victims of the Adimali landslide following a meeting chaired by Minister Roshy Augustine. The protest by the affected families was called off after the contracting company released the outstanding funds.
