കൊല്ലം: കരുനാഗപ്പള്ളിയിൽ ഗുണ്ടാ നേതാവ് അലുവ അതുലിനെ കൊലപ്പെടുത്തിയത് കൃത്യമായ ആസൂത്രണത്തോടെയെന്ന് പോലീസ് (Atul murder case). റിമാൻഡ് കഴിഞ്ഞ് പുറത്തിറങ്ങിയ അതുലിനെ 48 മണിക്കൂറിനുള്ളിൽ വകവരുത്താനായിരുന്നു ഗുണ്ടാസംഘത്തിന്റെ പദ്ധതിയെന്ന് കൊല്ലം സിറ്റി പോലീസ് കമ്മീഷണർ ഹേമലത ഐപിഎസ് അറിയിച്ചു. കേസിൽ നിലവിൽ 10 പേർ പിടിയിലായിട്ടുണ്ട്.
കൊലപാതകത്തിന് പിന്നിൽ ജിം സന്തോഷ് വധക്കേസിലെ നേരിട്ടുള്ള പകയല്ലെന്നാണ് പോലീസിന്റെ പ്രാഥമിക നിഗമനം. സന്തോഷ് വധത്തിന് ശേഷം കടത്തൂർ സംഘത്തിലെ അനീർ എന്നയാളെ ആക്രമിച്ചതിലുള്ള പ്രതികാരമാണ് അതുലിന്റെ കൊലപാതകത്തിലേക്ക് നയിച്ചത്.
സിനിമാ സ്റ്റൈൽ ആക്രമണം
കരുനാഗപ്പള്ളി സ്റ്റേഷനിൽ ഒപ്പിട്ട് മടങ്ങിയ അതുലിനെ രണ്ട് കാറുകളിലായാണ് പ്രതികൾ പിന്തുടർന്നത്. സ്റ്റേഷനിൽ നിന്നിറങ്ങി കൃത്യം 17-ാം മിനിറ്റിൽ പുതിയകാവ് ജംഗ്ഷനിൽ വെച്ച് ആക്രമണം നടത്തി. ഹരിയാന രജിസ്ട്രേഷനിലുള്ള ഇന്നോവ കാർ ഉപയോഗിച്ച് അതുലിന്റെ വാഹനത്തെ ഇടിച്ചു തെറിപ്പിച്ച ശേഷം ഒന്നര മിനിറ്റിനുള്ളിൽ വെട്ടിക്കൊലപ്പെടുത്തി പ്രതികൾ കടന്നുകളയുകയായിരുന്നു.
സിനിമയെ വെല്ലുന്ന ചേസിംഗ്: കൃത്യത്തിന് ശേഷം കോട്ടയം ഭാഗത്തേക്ക് കടന്ന പ്രതികളെ മുണ്ടക്കയത്ത് വെച്ചാണ് പോലീസ് പിടികൂടിയത്. എഎൻപിആർ (ANPR) ക്യാമറകൾ വഴി വാഹനം തിരിച്ചറിഞ്ഞ പോലീസ് ഒരു മണിക്കൂറോളം നീണ്ട ചേസിംഗിനൊടുവിലാണ് ഇവരെ വലയിലാക്കിയത്. കൊലപാതകത്തിൽ നേരിട്ട് പങ്കെടുത്ത ആറ് പേരും സഹായികളായ നാല് പേരുമാണ് ഇപ്പോൾ കസ്റ്റഡിയിലുള്ളത്.
പ്രതികളുടെ വാഹനത്തിൽ നിന്ന് മാരകായുധങ്ങൾ കണ്ടെടുത്തു. ഗുണ്ടാ സംഘങ്ങൾക്കെതിരെ വിട്ടുവീഴ്ചയില്ലാത്ത നടപടി തുടരുമെന്നും കൂടുതൽ പ്രതികൾക്കായി അന്വേഷണം ഊർജിതമാക്കിയെന്നും കമ്മീഷണർ വ്യക്തമാക്കി.
Story Summary:
Kollam City Police arrested 10 individuals for the planned murder of gang leader Aluva Atul in Karunagappally. According to Commissioner Hemalatha IPS, the gang aimed to kill Atul within 48 hours of his release from remand as revenge for an earlier attack on Aneer from the Kadathur gang. The assailants used a Haryana-registered Innova to ram Atul’s car and completed the murder within 90 seconds. They were apprehended in Mundakkayam after a high-speed police chase aided by ANPR camera tracking.
