തിരുവനന്തപുരം: ആറ്റുകാൽ ഭഗവതി ക്ഷേത്രത്തിൽ പൊങ്കാല അർപ്പിക്കാനെത്തിയതിന് പിന്നാലെ നേരിടേണ്ടി വന്ന സൈബർ ആക്രമണത്തിൽ വൈകാരിക പ്രതികരണവുമായി നടി അന്ന രാജൻ (Anna Rajan Attukal Pongala controversy). താരത്തിന്റെ വസ്ത്രധാരണത്തെയും ഭാവങ്ങളെയും ചൊല്ലി സോഷ്യൽ മീഡിയയിൽ ഉയർന്ന വിമർശനങ്ങൾക്കും ട്രോളുകൾക്കും മറുപടിയുമായാണ് താരം എത്തിയത്. തന്റെ പ്രവൃത്തികൾ ആരുടെയെങ്കിലും മനസ്സിനെ വേദനിപ്പിച്ചിട്ടുണ്ടെങ്കിൽ ഹൃദയപൂർവ്വം ക്ഷമ ചോദിക്കുന്നുവെന്ന് അന്ന ഇൻസ്റ്റാഗ്രാമിൽ കുറിച്ചു.
“ഏറ്റവും ഭക്തിയോടെയാണ് ഞാൻ അവിടെ എത്തിയത്. ആ പവിത്രമായ നിമിഷത്തിനിടയിൽ ചില അനാവശ്യമായ വീഡിയോ ക്ലിപ്പുകൾ പകർത്തി പങ്കുവെക്കപ്പെട്ടത് കണ്ടപ്പോൾ വലിയ വേദന തോന്നി. എന്റെ ഭക്തിയെ ദുർബലപ്പെടുത്തുന്ന രീതിയിലാണ് ചില ദൃശ്യങ്ങൾ അവതരിപ്പിച്ചത്.”
“എന്റെ സാരിയോ ഭാവങ്ങളോ കാരണം ഏതെങ്കിലും ഭക്തരുടെ മനസ്സിൽ വേദനയുണ്ടായിട്ടുണ്ടെങ്കിൽ ഞാൻ ക്ഷമ ചോദിക്കുന്നു. ഒരിക്കലും അതായിരുന്നില്ല എന്റെ ലക്ഷ്യം. ആ ചൂടും പ്രാർത്ഥനയും എന്റെ ചിരിയുടെ പിന്നിലെ സത്യസന്ധതയും അമ്മയ്ക്കറിയാം. ആ സത്യം മാത്രം മതി എനിക്ക്.”- അന്ന രാജൻ കുറിച്ചു.
പൊങ്കാല ഇടുന്നതിനിടയിലുള്ള താരത്തിന്റെ വീഡിയോകൾ വൈറലായതോടെ, വസ്ത്രധാരണം ഉചിതമല്ലെന്നും ‘റീച്ചിന്’ വേണ്ടിയാണ് താരം എത്തിയതെന്നും തരത്തിൽ കടുത്ത വിമർശനങ്ങൾ ഉയർന്നിരുന്നു. ഇതിനെതിരെയാണ് താരം രംഗത്തെത്തിയത്.
ആദ്യമായാണ് താൻ ആറ്റുകാൽ അമ്മയ്ക്ക് പൊങ്കാല അർപ്പിക്കുന്നതെന്നും ഒരു വിനീതയായ ഭക്തയായി എന്നും തുടരുമെന്നും താരം കൂട്ടിച്ചേർത്തു.
Story Summary:
Actress Anna Rajan issued a heartfelt apology following cyberattacks regarding her attire and behavior during the Attukal Pongala festival. She stated that she attended the ritual with pure devotion and expressed pain over how certain video clips were circulated to misinterpret her intentions. Anna clarified that if her actions inadvertently hurt any devotee’s sentiments, she sincerely apologizes, adding that her faith remains between her and the deity.
