കൊച്ചി: വ്യവസായി സി.ജെ. റോയിയുടെ അപ്രതീക്ഷിത വിയോഗം സൃഷ്ടിച്ച ഞെട്ടലിലാണ് ബിഗ് ബോസ് വിജയിയും സംവിധായകനുമായ അഖിൽ മാരാർ (Akhil Marar on CJ Roy). കടബാധ്യതകളിൽ വലഞ്ഞിരുന്ന തനിക്ക് ബിഗ് ബോസ് വിജയത്തിലൂടെ 50 ലക്ഷം രൂപ സമ്മാനത്തുകയായി നൽകി ജീവിതം മാറ്റിമറിച്ചത് റോയ് സാറാണെന്ന് അഖിൽ ഓർമ്മിച്ചു.
“പണ്ട് 15,000 രൂപയുടെ ക്രെഡിറ്റ് കാർഡ് കുടിശ്ശിക തീർക്കാൻ പോലും കഴിയാതെ ബാധ്യതകളിൽ പെട്ടുപോയവനാണ് ഞാൻ. അങ്ങനെയുള്ള ഒരാളുടെ അക്കൗണ്ടിലേക്ക് 50 ലക്ഷം രൂപ സമ്മാനമായി നൽകി അനുഗ്രഹിച്ച വലിയ മനുഷ്യനാണ് അദ്ദേഹം.” കഴിഞ്ഞ 18 വർഷമായി റിയാലിറ്റി ഷോകൾക്ക് വൻതുക സമ്മാനമായി നൽകുന്നത് വെറുമൊരു കോർപ്പറേറ്റ് തീരുമാനമല്ലെന്നും അത് റോയ് എന്ന വ്യക്തിയുടെ കലാകാരന്മാരോടുള്ള സ്നേഹമാണെന്നും അഖിൽ പറഞ്ഞു.
സുശാന്ത് സിംഗ് രജ്പുത്തിന്റെ മരണത്തിന് ശേഷം തന്നെ ഇത്രയേറെ ഞെട്ടിച്ച മറ്റൊരു മരണമില്ലെന്ന് അഖിൽ പറഞ്ഞു. “അദ്ദേഹത്തെപ്പോലൊരു മനുഷ്യന് താൻ ഇനി ഈ ഭൂമിയിൽ വേണ്ടെന്ന തീരുമാനം എടുക്കാൻ എന്തായിരിക്കും കാരണം? ഉദ്യോഗസ്ഥ പീഡനമാണോ അതോ മറ്റ് സമ്മർദ്ദങ്ങളാണോ?” – അഖിൽ ചോദിച്ചു.
കലാകാരന്മാരെ സഹായിക്കുന്നതിലും സിനിമകൾ നിർമ്മിക്കുന്നതിലും റോയ് സി.ജെ കാട്ടിയ താല്പര്യം അഖിൽ നന്ദിയോടെ സ്മരിച്ചു. അദ്ദേഹത്തിന്റെ മരണം ബിസിനസ് മേഖലയ്ക്കും ഒരുപാട് സാധാരണക്കാർക്കും വലിയ നഷ്ടമാണെന്നും അഖിൽ കൂട്ടിച്ചേർത്തു.
