തിരുവനന്തപുരം: ജന്മനാ ബാധിച്ച മാരകമായ കരൾരോഗത്തെ അതിജീവിച്ച് ആറുമാസം പ്രായമുള്ള ധ്രിയ പൂർണ്ണ ആരോഗ്യവതിയായി വീട്ടിലേക്ക് മടങ്ങുന്നു (Liver transplant Kerala). തിരുവനന്തപുരം കിംസ്ഹെൽത്തിൽ നടന്ന സങ്കീർണ്ണമായ കരൾ മാറ്റിവെക്കൽ ശസ്ത്രക്രിയയിലൂടെയാണ് കുഞ്ഞിന് പുതുജീവൻ ലഭിച്ചത്. രാജ്യത്തെ ഏറ്റവും പ്രായം കുറഞ്ഞ അവയവദാതാവായി മാറിയ ‘ആലിൻ’ എന്ന കുഞ്ഞിൽ നിന്നാണ് ധ്രിയ കരൾ സ്വീകരിച്ചത്.
നവജാതശിശുക്കളിൽ 70,000-ൽ ഒരാൾക്ക് മാത്രം ബാധിക്കുന്ന ‘ബിലിയറി അത്രേസിയ’ (Biliary Atresia) എന്ന രോഗാവസ്ഥയായിരുന്നു ധ്രിയയ്ക്ക്. കരളിൽ നിന്നുള്ള പിത്തനാളി തടസ്സപ്പെടുന്നത് മൂലം കരളിന്റെ പ്രവർത്തനം നിലയ്ക്കുന്ന അവസ്ഥയാണിത്. നേരത്തെ മറ്റൊരു ആശുപത്രിയിൽ ‘കസായ്’ ശസ്ത്രക്രിയയ്ക്ക് വിധേയയായെങ്കിലും പോർട്ടൽ ഹൈപ്പർടെൻഷൻ ഉൾപ്പെടെയുള്ള സങ്കീർണ്ണതകൾ ഉണ്ടായതോടെയാണ് കുഞ്ഞിനെ കിംസ്ഹെൽത്തിലേക്ക് മാറ്റിയത്. കരൾ മാറ്റിവെക്കൽ മാത്രമായിരുന്നു കുഞ്ഞിന്റെ ജീവൻ രക്ഷിക്കാനുള്ള ഏക മാർഗ്ഗം.
കിംസ്ഹെൽത്തിലെ ലിവർ ട്രാൻസ്പ്ലാന്റ് സർജറി വിഭാഗം മേധാവി ഡോ. ഷിറാസ് അഹമ്മദ് റാഥർ, സീനിയർ കൺസൾട്ടന്റ് ഡോ. ഷബീറലി ടി.യു. എന്നിവരുടെ നേതൃത്വത്തിൽ 12 മണിക്കൂർ നീണ്ട ശസ്ത്രക്രിയയിലൂടെയാണ് അവയവമാറ്റം പൂർത്തിയാക്കിയത്. ദാതാവിന്റെയും സ്വീകർത്താവിന്റെയും പ്രായം കണക്കിലെടുക്കുമ്പോൾ വൈദ്യശാസ്ത്രത്തിന് തന്നെ വലിയ വെല്ലുവിളിയായിരുന്നു ഈ ശസ്ത്രക്രിയ.
അനസ്തേഷ്യ വിദഗ്ധർ, തീവ്രപരിചരണ വിഭാഗം, നഴ്സുമാർ എന്നിവരടങ്ങുന്ന വലിയൊരു സംഘത്തിന്റെ 24 മണിക്കൂർ നീണ്ട ജാഗ്രത ശസ്ത്രക്രിയയ്ക്ക് ശേഷമുള്ള പരിചരണത്തിൽ നിർണ്ണായകമായി. നിലവിൽ ധ്രിയയുടെ കരൾ സാധാരണ നിലയിൽ പ്രവർത്തിച്ചു തുടങ്ങിയെന്നും കുഞ്ഞ് പൂർണ്ണ ആരോഗ്യവതിയാണെന്നും ഡോക്ടർമാർ അറിയിച്ചു.
ചികിത്സാ സംഘം: ഡോ. വർഗീസ് എൽദോ, ഡോ. ഹാഷിർ എ., ഡോ. പ്രിജിത്ത് ആർ.എസ്., ഡോ. മധു ശശിധരൻ, ഡോ. അനു കെ. വാസു, ഡോ. മനീഷ് കുമാർ യാദവ്, ഡോ. മനോജ് കെ.എസ്, ഡോ. ഷിജു കുമാർ സി എന്നിവരടങ്ങുന്ന വിദഗ്ധ സംഘമാണ് ഈ ദൗത്യത്തിന് പിന്നിൽ പ്രവർത്തിച്ചത്.
Story Summary:
Six-month-old Dhriya successfully underwent a complex liver transplant at KIMSHEALTH, Trivandrum, after battling Biliary Atresia. She received the liver from Alin, India’s youngest organ donor. The 12-hour surgery was led by Dr. Shiras Ahmed Rather and Dr. Shabeerali T.U. Following intensive post-operative care, Dhriya’s liver functions have returned to normal, and she has been discharged.
