തിരുവനന്തപുരം: വരാനിരിക്കുന്ന നിയമസഭാ തെരഞ്ഞെടുപ്പിനുള്ള കോൺഗ്രസ് സ്ഥാനാർത്ഥി നിർണ്ണയ ചർച്ചകൾക്കായി കെപിസിസി തെരഞ്ഞെടുപ്പ് സമിതി ഇന്ന് തിരുവനന്തപുരത്ത് യോഗം ചേരും. സിറ്റിങ് എംഎൽഎമാരെ വീണ്ടും മത്സരിപ്പിക്കുന്നതിലടക്കം നിർണ്ണായകമായ ചർച്ചകൾ യോഗത്തിലുണ്ടാകും. ഇന്നു മുതൽ വ്യാഴാഴ്ച വരെ ജില്ല തിരിച്ചുള്ള കൂടിക്കാഴ്ചകളാണ് നിശ്ചയിച്ചിരിക്കുന്നത്.(Candidate selection, KPCC election committee meeting today)
സിറ്റിങ് എംഎൽഎമാരെ ഭൂരിഭാഗം പേരെയും വീണ്ടും മത്സരിപ്പിക്കാനാണ് നിലവിലെ ആലോചനയെങ്കിലും ചില സീറ്റുകളിൽ അനിശ്ചിതത്വം നിലനിൽക്കുന്നുണ്ട്. ലൈംഗികാരോപണക്കേസിൽ കുറ്റാരോപിതനായതിനെത്തുടർന്ന് പാർട്ടി പുറത്താക്കിയ പാലക്കാട് എംഎൽഎ രാഹുൽ മാങ്കൂട്ടത്തിലിനെ ഇത്തവണ സ്ഥാനാർത്ഥിയായി പരിഗണിക്കില്ല.
തൃപ്പൂണിത്തുറയിൽ നിന്നും വീണ്ടും മത്സരിക്കാനില്ലെന്ന് സിറ്റിങ് എംഎൽഎ കെ. ബാബു നേതൃത്വത്തെ അറിയിച്ചു. പകരം പുതിയ സ്ഥാനാർത്ഥിയെ കണ്ടെത്താനുള്ള ചർച്ചകൾ മണ്ഡലത്തിൽ നടക്കും. മറ്റ് രണ്ട് സിറ്റിങ് സീറ്റുകളിൽ കൂടി നിലവിൽ സ്ഥാനാർത്ഥിത്വത്തെക്കുറിച്ച് ആശക്കുഴപ്പമുണ്ട്. ഇവിടുത്തെ കാര്യത്തിൽ അന്തിമ തീരുമാനം ഹൈക്കമാൻഡിന് വിടാനാണ് സാധ്യത.
സ്ഥാനാർത്ഥി നിർണ്ണയത്തിൽ പ്രാദേശികമായ അഭിപ്രായങ്ങൾ അറിയുന്നതിനായി കെപിസിസി നേതൃത്വം ജില്ല തിരിച്ച് ചർച്ചകൾ നടത്തും. ഡിസിസി അധ്യക്ഷന്മാർ, ജില്ലകളിലെ കോർ കമ്മിറ്റി അംഗങ്ങൾ എന്നിവരുമായി നേതൃത്വം കൂടിക്കാഴ്ച നടത്തും. ഇന്നു മുതൽ വ്യാഴാഴ്ച വരെയാണ് ഈ യോഗങ്ങൾ നടക്കുക.
