തിരുവനന്തപുരം: കൊറിയർ കമ്പനികളുടെ പേരിൽ വ്യാജ എസ്എംഎസുകൾ അയച്ച് കോളുകളും മെസേജുകളും തട്ടിയെടുക്കുന്ന ‘കോൾ ഫോർവേഡിങ്’ തട്ടിപ്പിനെതിരെ കേരള പോലീസ് മുന്നറിയിപ്പ് നൽകി. പ്രമുഖ കൊറിയർ കമ്പനികളുടെ പേരിൽ വരുന്ന എസ്എംഎസുകളാണ് തട്ടിപ്പിനായി പ്രധാനമായും ഉപയോഗിക്കുന്നത്.(Call forwarding scam, warns Kerala Police)
നിങ്ങളുടെ കൊറിയർ വിവരങ്ങൾക്കായി ഒരു പ്രത്യേക കോഡ് ഡയൽ ചെയ്യാൻ എസ്എംഎസിലൂടെ ആവശ്യപ്പെടുന്നു. ഉദാഹരണത്തിന് *21* <മൊബൈൽ നമ്പർ> # എന്ന കോഡ് ഡയൽ ചെയ്യാൻ നിങ്ങളോട് ആവശ്യപ്പെടും. നിങ്ങൾ ഈ കോഡ് ഡയൽ ചെയ്യുന്നതോടെ നിങ്ങളുടെ ഫോണിലേക്ക് വരുന്ന കോളുകളും ഒടിപി ഉൾപ്പെടെയുള്ള എസ്എംഎസുകളും തട്ടിപ്പുകാരുടെ ഫോണിലേക്ക് ഫോർവേഡ് ചെയ്യപ്പെടും.
നിങ്ങളുടെ വാട്സ്ആപ്പ് അക്കൗണ്ട് ഹാക്ക് ചെയ്യാനും ബാങ്ക് അക്കൗണ്ടുകൾ ആക്സസ് ചെയ്ത് പണം തട്ടാനും ഇതുവഴി സാധിക്കും. അപരിചിതരായ ആളുകൾ ആവശ്യപ്പെടുന്ന ഒരു കോഡും നിങ്ങളുടെ ഫോണിൽ ഡയൽ ചെയ്യരുത്. ബാങ്ക് ഉദ്യോഗസ്ഥരോ സിം കാർഡ് കമ്പനി പ്രതിനിധികളോ എന്ന വ്യാജേന വിളിക്കുന്നവരും ഇതേ തന്ത്രം ഉപയോഗിക്കാറുണ്ട്.
സന്ദേശങ്ങളിൽ വരുന്ന ലിങ്കുകളിൽ ക്ലിക്ക് ചെയ്യുകയോ രഹസ്യ വിവരങ്ങൾ പങ്കുവെക്കുകയോ ചെയ്യരുത്. നിങ്ങളുടെ ഫോണിൽ ഏതെങ്കിലും തരത്തിലുള്ള കോൾ ഫോർവേഡിങ് ആക്റ്റീവ് ആണെന്ന് സംശയമുണ്ടെങ്കിൽ ഉടൻ ##002# ഡയൽ ചെയ്ത് അത് റദ്ദാക്കുക. തട്ടിപ്പിനിരയായാൽ ഒട്ടും വൈകാതെ 1930 എന്ന നമ്പറിലോ www.cybercrime.gov.in എന്ന വെബ്സൈറ്റിലോ പരാതി രജിസ്റ്റർ ചെയ്യുക.
