തിരുവനന്തപുരം: ജനുവരി 31-ന് കാര്യവട്ടം ഗ്രീൻഫീൽഡ് സ്റ്റേഡിയത്തിൽ നടക്കുന്ന ഇന്ത്യ-ന്യൂസിലൻഡ് ടി20 മത്സരത്തിനായുള്ള ടിക്കറ്റുകൾ റെക്കോർഡ് വേഗതയിൽ വിറ്റുതീർന്നു. ടിക്കറ്റ് ബുക്കിംഗ് ആരംഭിച്ച് 12 മണിക്കൂറിനുള്ളിൽ തന്നെ 80 ശതമാനം ടിക്കറ്റുകളും വിറ്റുപോയിരുന്നു. കേരളത്തിൽ നടന്ന അന്താരാഷ്ട്ര ക്രിക്കറ്റ് മത്സരങ്ങളുടെ ചരിത്രത്തിലെ ഏറ്റവും വേഗത്തിലുള്ള ടിക്കറ്റ് വിൽപനയാണിത്.(India-New Zealand match tickets sold out in a day)
ടി20 ലോകകപ്പിന് മുൻപ് ഇന്ത്യ നാട്ടിൽ കളിക്കുന്ന അവസാന മത്സരമാണിത്. വിദ്യാർത്ഥികൾക്ക് 250 രൂപയ്ക്ക് കളി കാണാൻ അവസരം ഒരുക്കിയത് വലിയ ജനപങ്കാളിത്തത്തിന് കാരണമായി.മലയാളി താരം സഞ്ജു സാംസൺ ഇന്ത്യൻ ജേഴ്സിയിൽ കളിക്കാനിറങ്ങുന്നതും വലിയ ആരവം സൃഷ്ടിച്ചിട്ടുണ്ട്.
വിദ്യാർത്ഥികൾക്ക്: 250 രൂപ, അപ്പർ ടയർ: 500 രൂപ, ലോവർ ടയർ: 1200 രൂപ എന്നിങ്ങനെയാണ് വില. ടിക്കറ്റുകൾ വിറ്റുതീർന്ന സാഹചര്യത്തിൽ ഓൺലൈനിൽ വ്യാജ ടിക്കറ്റുകൾ വിൽക്കുന്നതായി ശ്രദ്ധയിൽപ്പെട്ടിട്ടുണ്ടെന്നും ഇതിനെതിരെ പോലീസിന്റെ സഹായം തേടുമെന്നും കേരള ക്രിക്കറ്റ് അസോസിയേഷൻ അറിയിച്ചു.
