കോഴിക്കോട്: പാണക്കാട് കുടുംബത്തിനെതിരായ പ്രസംഗത്തിന്റെ പേരിൽ തനിക്ക് ശാസന നൽകിയെന്ന വാർത്തകൾ അടിസ്ഥാനരഹിതമാണെന്ന് ഉമർ ഫൈസി മുക്കം. വിഷയത്തിൽ സമസ്ത നേതൃത്വം തന്നോട് വിശദീകരണം തേടിയിട്ടില്ലെന്നും അദ്ദേഹം വ്യക്തമാക്കി.(No one has scolded me, says Umar Faizy Mukkam)
ബാഫഖി തങ്ങളെയോ പാണക്കാട് കുടുംബത്തെയോ താൻ അധിക്ഷേപിച്ചിട്ടില്ല. തന്റെ പ്രസംഗം പൂർണ്ണമായി കേൾക്കാത്തവരാണ് വിവാദത്തിന് പിന്നിൽ. പാരമ്പര്യത്തെക്കുറിച്ച് താൻ നടത്തിയ പരാമർശങ്ങൾ മതപരമായ ചില യാഥാർത്ഥ്യങ്ങൾ വിവരിക്കുക മാത്രമായിരുന്നു. അത് ആരെയും വ്യക്തിപരമായി അധിക്ഷേപിക്കാനല്ല എന്നും അദ്ദേഹം കൂട്ടിച്ചേർത്തു.
സമസ്തയുടെ ഔദ്യോഗിക വേദികളിൽ നിന്ന് തനിക്കെതിരെ യാതൊരു നടപടിയും ഉണ്ടായിട്ടില്ല. ശാസിച്ചു എന്ന വാർത്തകൾ മാധ്യമ സൃഷ്ടി മാത്രമാണെന്നും അദ്ദേഹം അവകാശപ്പെട്ടു.
