കണ്ണൂർ: എൽ.ഡി.എഫിനെതിരെ എതിരാളികൾ അഴിച്ചുവിടുന്ന നുണപ്രചാരണങ്ങളെ ഓരോന്നായി പൊളിക്കണമെന്ന് മുഖ്യമന്ത്രി പിണറായി വിജയൻ (Pinarayi Vijayan Dharmadam speech). മമ്പറത്ത് നടന്ന ധർമ്മടം മണ്ഡലം എൽ.ഡി.എഫ് കൺവെൻഷനിൽ സംസാരിക്കുകയായിരുന്നു അദ്ദേഹം. നേരായ രീതിയിൽ രാഷ്ട്രീയമായി എതിർക്കാൻ കഴിയാത്തവർ വസ്തുതാവിരുദ്ധമായ കാര്യങ്ങൾ വീടുകൾ തോറും കയറി പ്രചരിപ്പിക്കുകയാണെന്നും അദ്ദേഹം ആരോപിച്ചു.
ഗീബൽസിനെപ്പോലും കടത്തിവെട്ടുന്ന രീതിയിലാണ് എതിരാളികളുടെ പ്രവർത്തനം. നേരും നെറിയും ഉപേക്ഷിച്ചാണ് അവർ എൽ.ഡി.എഫിനെ നേരിടുന്നത്. പ്രവർത്തകർ ഓരോ വീട്ടിലുമെത്തി ഈ നുണകൾ ജനങ്ങൾക്ക് മുന്നിൽ തുറന്നുകാട്ടണം. കേരളം നൽകുന്ന ‘നേറ്റിവിറ്റി കാർഡ്’ ആർക്കും തകർക്കാൻ കഴിയില്ല. താൻ കേരളത്തിന്റെ സന്തതിയാണെന്ന സത്യം അംഗീകരിക്കാൻ പോലും സംഘപരിവാർ തയ്യാറാകുന്നില്ലെന്ന് മുഖ്യമന്ത്രി പറഞ്ഞു.
സ്ഥാനാർത്ഥി എന്ന നിലയിൽ മണ്ഡലത്തിലെ എല്ലാവരെയും നേരിൽ കാണാൻ പ്രയാസമുണ്ട്. സംസ്ഥാനത്തെ എല്ലാ മണ്ഡലങ്ങളിലും എത്തേണ്ടതുണ്ട്. തന്റെ ഈ പരിമിതി മനസ്സിലാക്കി പ്രവർത്തകർ പ്രചാരണം ഏറ്റെടുക്കണമെന്നും അദ്ദേഹം അഭ്യർത്ഥിച്ചു. സി.പി.എം സംസ്ഥാന സെക്രട്ടറി എം.വി. ഗോവിന്ദനും കൺവെൻഷനിൽ പങ്കെടുത്തു. ചടങ്ങിൽ വെച്ച് പത്തനാപുരം ഗാന്ധി ഭവനിലെ അന്തേവാസികൾ സമാഹരിച്ച തുക, മുഖ്യമന്ത്രിയുടെ തിരഞ്ഞെടുപ്പ് പത്രിക സമർപ്പിക്കുമ്പോൾ കെട്ടിവെക്കാനായി കൈമാറി.
Story Summary
Chief Minister Pinarayi Vijayan, speaking at the Dharmadam LDF convention in Mambaram, urged party workers to counter opposition lies by reaching out to every household. He accused opponents of abandoning political integrity and using “Goebbels-style” tactics to spread misinformation against the LDF. The CM highlighted that even his identity as a native of Kerala is being questioned by the Sangh Parivar. CPM State Secretary M.V. Govindan also attended the event, where inmates from Pathanapuram Gandhi Bhavan contributed funds for the CM’s election security deposit.
