ആലപ്പുഴ: സിപിഎം ജില്ലാ സെക്രട്ടേറിയറ്റ് യോഗത്തിലാണ് എ.എം. ആരിഫിനെ ചേർത്തല മണ്ഡലം തിരഞ്ഞെടുപ്പ് ചുമതലകളിൽ നിന്ന് ഒഴിവാക്കാൻ തീരുമാനിച്ചത് (A M Ariff Aluva candidate CPM). ജില്ലാ സെക്രട്ടേറിയറ്റ് അംഗം വി.ജി. മോഹനനാണ് പകരം ചുമതല നൽകിയിരിക്കുന്നത്. ആരിഫ് മത്സരരംഗത്തിറങ്ങുന്നതിനാലാണ് സംഘടനാപരമായ ഈ മാറ്റമെന്നാണ് പാർട്ടി വൃത്തങ്ങൾ നൽകുന്ന സൂചന.
യുഡിഎഫിന്റെ ഉറച്ച കോട്ടയായ ആലുവയിൽ അൻവർ സാദത്തിനെ നേരിടാൻ എ.എം. ആരിഫിനെ ഇറക്കാനാണ് സിപിഎം ആലോചിക്കുന്നത്. കഴിഞ്ഞ മൂന്ന് തവണയായി അൻവർ സാദത്ത് വിജയിക്കുന്ന മണ്ഡലത്തിൽ കരുത്തനായ ഒരു സ്ഥാനാർത്ഥിയെ എത്തിച്ച് അട്ടിമറി വിജയം നേടുകയാണ് ലക്ഷ്യം.
സ്ഥാനാർത്ഥിയാകുന്നവർ തിരഞ്ഞെടുപ്പ് കമ്മിറ്റി ഭാരവാഹികളാകുന്നത് ഒഴിവാക്കുന്ന പാർട്ടിയുടെ കീഴ്വഴക്കം അനുസരിച്ചാണ് ചേർത്തലയിലെ ചുമതലയിൽ നിന്ന് ആരിഫിനെ മാറ്റിയത്.2011 മുതൽ അൻവർ സാദത്ത് കൈവശം വെച്ചിരിക്കുന്ന മണ്ഡലമാണിത്. 2021-ൽ 18,886 വോട്ടുകളുടെ ഭൂരിപക്ഷത്തിലാണ് അദ്ദേഹം വിജയിച്ചത്. ന്യൂനപക്ഷ വോട്ടുകൾക്കും വ്യക്തിപ്രഭാവത്തിനും നിർണ്ണായക സ്വാധീനമുള്ള ആലുവയിൽ ആരിഫിന്റെ സാന്നിധ്യം മത്സരം കടുപ്പിക്കും.
ആരിഫ് ആലുവയിലേക്ക് മാറുന്നതോടെ ചേർത്തലയിൽ മുൻ മന്ത്രി പി. പ്രസാദ് തന്നെ എൽഡിഎഫ് സ്ഥാനാർത്ഥിയായി തുടരാനാണ് സാധ്യത. ആലപ്പുഴയിലെയും എറണാകുളത്തെയും സ്ഥാനാർത്ഥി പട്ടികയിൽ ഈ മാറ്റം വലിയ ചർച്ചകൾക്ക് വഴിവെച്ചിട്ടുണ്ട്.
Story Summary: CPM leader and former MP A.M. Ariff has been removed from his position as the Secretary of the Cherthala Constituency Election Committee. This move suggests that he will be the LDF candidate for the Aluva constituency in the upcoming Kerala Assembly Election. District Secretariat member V.G. Mohanan has replaced him in Cherthala. Ariff is expected to take on UDF’s Anwar Sadat in Aluva.
